Skjálftinn sem varð vestur af Henglinum í morgun hafði engin áhrif á rekstur Hellisheiðarvirkjunar. Í virkjuninni er unnið rafmagn og heitt vatn fyrir höfuðborgarsvæðið.

Hengilssvæðið er þekkt jarðskjálftasvæði og hvortveggja Hellisheiðarvirkjun og Nesjavallavirkjun, sem er norðan við Hengilinn, eru hannaðar með tilliti til þess.

Upptök skjálftans voru nokkuð vestur af athafnasvæði virkjunarinnar á talsverðu dýpi. Árið 2011 var skjálftavirkni sem tengd var breytingum á niðurdælingu jarðhitavatns frá Hellisheiðarvirkjun. Engin slík breyting var í aðdraganda skjálftans í morgun en almennt getur jarðhitavinnsla haft áhrif á spennu í nærliggjandi jarðlögum.

Vísindafólk Orku náttúrunnar hefur verið í sambandi við starfssystkini sín hjá Jarðvárvakt Veðurstofunnar í morgun og mun fylgjast grannt með þróun mála á svæðinu.

Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.