Hafa samband Netspjall

🍂Hvað eru kolefnisspor og af hverju skipta þau máli?

Kolefnisspor vöru og þjónustu segja okkur hversu mikill útblástur gróðurhúsalofttegunda fylgir framleiðslu og notkun þeirra. Kolefnisspor orkuframleiðslu er yfirleitt mælt í losun á koltvísýringsígildum á framleidda orkueiningu, eða sem grömm af CO2 á hverja kílówattstund raforku og varma.

Því minna sem kolefnissporið er, því minni áhrif hefur varan eða þjónustan á loftslagsbreytingar og hlýnun jarðar.


Kolefnislosun frá orkuframleiðslu


Hvernig reikna ég út kolefnisspor?

Það getur reynst snúið að reikna út nákvæmt kolefnisspor en öll erum við að verða meira meðvituð um mikilvægi þess og samfélagið kallar sífellt á betri upplýsingagjöf. Ýmis fyrirtæki, félagasamtök og/eða rannsóknarsetur hafa lagt sitt af mörkum til að reyna að auðvelda útreikninga og bjóða uppá einskonar kolefnisreiknivélar sem eru aðgengilegar almenningi. Reiknivélarnar geta sýnt hvernig daglegar athafnir svo sem ferðalög, matarval og rafmagnsnotkun geta haft áhrif á kolefnissporið okkar.

Árið 2017 losaði Orka náttúrunnar 7,5 gr CO2 eq/kWh. Ef þú ert í viðskiptum við ON geturðu farið inn á Mínar síður, fundið út þína ársnotkun á kWH og margfaldað þá tölu með 7,5. Þá ættir þú að vera komin með þitt kolefnisspor vegna rafmagnsnotkunar árið 2017.

ON, ásamt Orkuveitusamstæðunni, skrifaði undir loftslagsyfirlýsingu Festu og Reykjavíkurborgar í nóvember 2015 ásamt 104 fyrirtækjum sem sammæltust um að taka skýra afstöðu í umhverfismálum og setja sér markmið.

Við hjá Orku náttúrunnar höfum sett okkur metnaðarfull markmið við minnkun á kolefnisspori. Okkar ávinningur verður þinn ávinningur og allir græða.


Hvernig er kolefnisspor ON reiknað?

Útblástur gróðurhúsalofttegunda sem hlýst beint af starfseminni vegna framleiðsluferla eða farartækja er reiknaður undir flokknum „Umfang 1“. Þar á eftir er losun vegna raf- og varmaorkunotkunar fyrirtækisins reiknuð undir „Umfangi 2“, þar sem oft erlendis fylgir orkunotkun mikil losun gróðurhúsalofttegunda. Í „Umfangi 3“ er síðan tekinn með útblástur sem hlýst af ýmsri nátengdri starfsemi við fyrirtækið, svo sem vegna flugferða, samgangna starfsmanna í og úr vinnu, urðunar á úrgangi frá starfseminni, og fleira.

Greenhouse gas protocol

Aðferðafræði Greenhouse Gas Protocol


Lækkandi kolefnisspor ON

99,6% af kolefnisspori ON árið 2017 (bein og óbein losun) kom frá jarðhitalofttegundum. Afgangurinn kom frá bílaflota (0,2%), flugferðum (0,1%) og urðun úrgangs (0,1%).

Losun á einingu [gr CO2 eq/kWh]


Hvar erum við og hvert stefnum við?

Markmið ON er að minnka kolefnissporið um 60% fyrir árið 2030 með eftirfarandi aðgerðum:

  • Hagnýting jarðhitalofttegunda
  • Binding í bergi
  • Landgræðsla og skógrækt
  • Bætt orkunýting
  • Vistvænn bílafloti
  • Boranir með raforku í stað díselolíu
  • Auka endurvinnslu og minnka úrgang
  • Sameiginlegar aðgerðir Orkuveitusamstæðunnar