Orka náttúrunnar mun á næstu vikum hefja uppsetningu 20 hleðslutengja á fimm nýjum staðsetningum í Reykjavík í kjölfar nýlegs útboðs. Eins og alltaf í Hverfahleðslu ON verða stöðvarnar 22 kW AC hleðslustöðvar, sem henta vel fyrir rafbílaeigendur í borginni.

Nýju staðsetningarnar eru við Hagamel/Kaplaskjólsveg, Þorfinnsgötu, Hátún, Kleppsveg 150-152 og Efstaland. Allar þessar staðsetningar eru valdar með það í huga að þjóna íbúum og öðrum rafbílanotendum á svæðum þar sem nálægð við þjónustu og afþreyingu er til staðar. Stefnt er að því að ljúka uppsetningu innan ársins.

Mikil uppbygging hjá ON

Orka náttúrunnar hóf uppbyggingu hverfahleðslna í Reykjavík árið 2021 eftir að fyrsta útboð borgarinnar. Þá voru sett upp 162 tengi á 32 staðsetningum víðsvegar um borgina. Síðan þá hefur ON lagt ríka áherslu á að auka framboð hleðslutengja með það að markmiði að bæta aðgengi fyrir rafbílaeigendur, bæði heima og á ferðinni. Í dag rekur ON einnig um 140 tengi víðsvegar um borgina í samstarfi við ýmsa aðila, sem styrkir enn frekar innviði fyrir rafbílaeigendur.

ON mun halda áfram að leggja sitt af mörkum til orkuskiptanna með því að fjölga tengjum og byggja upp öfluga og notendavæna innviði. Staðsetningar nýrra hleðslustöðva verða áfram vandlega valdar til að tryggja viðskiptavinum sem besta þjónustu og nálægð við aðra þjónustu og afþreyingu, hvort sem er í Reykjavík eða annars staðar á landinu.

Sjálfbær þróun í forgrunni

Þessi áfangi er liður í markmiði ON um að stuðla að sjálfbærri framtíð með innleiðingu umhverfisvænna lausna og auknu rafbílaneti. Með hverfahleðslum er tryggt að rafbílaeigendur hafi áreiðanlegt og aðgengilegt hleðslukerfi, sem er mikilvægt skref í átt að sjálfbærari samgöngum á Íslandi.