Árni Hrannar Haraldsson, framkvæmdastjóri Orku náttúrunnar, og Hjálmar Helgi Rögnvaldsson, forstöðumaður Viðskiptaþróunar og orkumiðlunar, tóku þátt í opnum fundi Landsvirkjunar um raforkuöryggi sem fram fór fimmtudaginn 21. nóvember í Grósku.

Hjálmar tók þátt í pallborðsumræðum um framboðsskyldu og skyldur sölufyrirtækjanna og Árni Hrannar í umræðum um skyldur flutningsfyrirtækisins og endursölu stórnotenda. Aðalfókus umræðna var settur á að greina hvert vandamálið væri og ræða mögulegar lausnir, bæði til skemmri og lengri tíma.

Á pallborðunum var m.a. rætt um mikilvægi þess að ábyrgð á ráðstöfun rafmagns til almennings verði skipt hlutfallslega á milli raforkuframleiðenda, í samræmi við hlutdeild hvers og eins í rafmagnsframleiðslu landsins. Fram kom í máli Hjálmars að Orka náttúrunnar, sem framleiddi 17% af rafmagninu í landinu á síðasta ári, hafi séð fyrir 27% af raforkuþörf almennings sama ár. Á sama tíma framleiddi Landsvirkjun megnið af raforku landsins, eða 73% af rafmagni í landinu, og afhenti 50% af þeirri orku sem almenningur þarf.

Þeir Hjálmar og Árni Hrannar, ásamt fleirum, voru sammála um að tryggja þyrfti raforkuöryggi almennings þar sem mikilvægt væri að auka samvinnu milli orkuframleiðenda, stjórnvalda og annarra hagaðila til að tryggja réttláta og ábyrga skiptingu orkuauðlinda. Mikilvægt væri að auka gegnsæi fyrir Raforkueftirlitið og nauðsynlegt væri að koma í veg fyrir tvítalningu í orkubókhaldi fyrirtækja fyrir annars vegar heildsölu og hins vegar til almennings.

Ráðstefnan, sem haldin var undir yfirskriftinni Raforkuöryggi, fyrir hverja?, snerti á fjölmörgum áskorunum í raforkumálum landsins, meðal annars hvernig tryggja megi raforkuöryggi almennings og jafnrétti í aðgengi að orku. Á fundinum voru einnig spiluð örmyndbönd, þar sem sérfræðingar og hagaðilar tjáðu sig um raforkuöryggi.

ON mun halda umræðunni áfram á ráðstefnu í Hörpu fimmtudaginn 28. nóvember nk. undir yfirskriftinni Forgangsröðun í orkuskorti. Við hvetjum öll áhugasöm að skrá sig hér.