ON hefur tekið í notkun nýjustu kynslóð af hraðhleðslustöðvum með 150 kW hleðslugetu. Stöðin er við höfuðstöðvar ON við Bæjarháls.

„Við hjá ON höfum þegar pantað tíu 150 kW hraðhleðslustöðvar sem við stefnum á að setja upp á árinu 2020 og hafa nú tvær þeirra verið settar upp. Þessar nýju stöðvar eru í raun algjör bylting fyrir rafbílaeigendur því nú tekur enga stund að hlaða,“ segir Hafrún Þorvaldsdóttir, verkefnastjóri hleðslunets ON. Beðið er eftir afhendingu fleiri stöðva, en ljóst er að Covid 19 hafi sett strik í reikninginn hjá framleiðendum. Væntingar ON eru að klára uppsetningu á öllum 150 kW stöðvunum í sumar og haust víða um land.

Á sjötta tug hraðhleðslustöðva ON hringinn í kringum landið

Árið 2014 hóf ON uppbyggingu innviða fyrir rafbíla þegar fyrsta hraðhleðslan var opnuð við Sævarhöfða Reykjavík. Þessi uppbygging er liður í þeirri stefnu fyrirtækisins að vera í fararbroddi í orkuskiptum í samgöngum á Íslandi.

ON rekur stærsta hraðhleðslunet landsins og eru stöðvarnar vel á sjötta tug talsins. Áhersla er lögð á að þétta og bæta hraðhleðslunetið til að þjóna rafbílaeigendum sem allra best.


Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.