Í síðustu viku fékk Orka náttúrunnar og Orkuveitan ánægjulega heimsókn frá Skipulagsstofnun. Markmið heimsóknarinnar var að efla samskipti og auka gagnkvæman skilning á þeim verkefnum sem stofnanirnar vinna að, sérstaklega í tengslum við umhverfismat, skipulagsmál og orkuöflun.

Fulltrúar Skipulagsstofnunar heimsóttu Hellisheiðarvirkjun, aðra af tveimur jarðvarmavirkjunum ON í Henglinum en þar er einnig Nesjavallavirkjun. Þar fengu þau kynningu á starfsemi fyrirtækjanna, m.a. um fyrirætlanir um aukna orkuöflun, sjálfbæra nýtingu jarðhita og nýsköpun í orkumálum.

Á fundinum var rætt um mikilvægi samráðs í skipulags- og framkvæmdamálum en einnig um þau tækifæri og áskoranir sem fylgja orkuskiptum og áframhaldandi þróun á svæðum á borð við Hengilssvæðið. Þá var einnig rætt um hvernig hægt sé að auka gagnsæi og skilvirkni í málsmeðferð og stuðla að góðu samstarfi milli opinberra aðila og framkvæmdaaðila.

Í lok heimsóknar var farið í stutta vettvangsferð um svæðið þar sem starfsemi ON var kynnt enn frekar.

Við þökkum Skipulagsstofnun kærlega fyrir komuna og hlökkum til áframhaldandi góðs samstarfs.