Hjálmar Helgi Rögnvaldsson, forstöðumaður viðskiptaþróunar og orkumiðlunar hjá Orku náttúrunnar, tók í gær þátt í áhugaverðu málþingi EFLU sem bar yfirskriftina Orkuspár sem vísa veginn. Þar sat hann í pallborði með lykilfólki úr íslenska orkugeiranum þar sem rætt var um orkuspár og framtíð orkumála.

„Nauðsynlegt er að hafa eina samræmda raforkuspá sem Umhverfis- og orkustofnun myndi vinna að með öllum helstu hagaðilum raforkumarkaðar, s.s. vinnslufyrirtækjum, flutnings- og dreififyrirtækjum og stórnotendum. Sú spá ætti að vera grunnspá við allar þær sviðsmyndir sem vert er að skoða til framtíðar. Hagkvæmni uppbyggingar þarf líka að vera til hliðsjónar enda er samkeppnishæfni Íslands lykilatriði fyrir áframhaldandi hagvöxt og velsæld í landinu. Góðar og samræmdar orkuspár eru því nauðsynlegar í stefnumarkandi ákvörðunum stjórnvalda og uppbyggingu kerfisins,“ sagði Hjálmar meðal annars í umræðunum.

Málþingið var haldið í gær, 5. maí, og var það tileinkað minningu Jóns Vilhjálmssonar sem hefði orðið 70 ára þann dag. Á dagskrá voru meðal annars erindi um þróun orkuspáa, hlutverk orkuspár í framtíðinni, sérstaða raforkuspár Landsnets og hvernig hægt sé að hagnýta afl- og orkuspár við uppbyggingu dreifikerfa.

Í pallborði sátu auk Hjálmars fulltrúar frá HS Orku, Landsneti, Landsvirkjun og Netorku, undir stjórn Ingvars Júlíusar Baldurssonar hjá EFLU.

Við þökkum EFLU fyrir það mikilvæga framtak að skapa vettvang fyrir samráð og samtal um eitt mikilvægasta málefni samtímans – næga og áreiðanlega orku til framtíðar.