Ráðstefnan „Forgangsröðun í orkuskorti – Hvernig tryggir jarðvarmi lífsgæði komandi kynslóða?“, sem haldin var af Orku náttúrunnar í morgun gekk virkilega vel. Mjög góð mæting var á ráðstefnuna og þátttakendur voru sammála um að umræðuefni ráðstefnunnar væri bæði tímabært og brýnt.

Erindi fyrirlesara fjölluðu meðal annars um þær áskoranir sem felast í því að tryggja raforkuöryggi fyrir almenning og ekki síður hvernig jarðvarmi stuðlar að lífsgæðum fyrir okkur öll.

Í pallborðsumræðum kom fram skýr krafa um að stjórnvöld þurfi að stíga inn í umræðuna og leggja línurnar til að tryggja jafnvægi milli raforkuöryggis, atvinnuuppbyggingar og lífsgæða framtíðarkynslóða.

Árni Hrannar Haraldsson, framkvæmdastjóri ON, lagði í sínum ummælum áherslu á mikilvægi þessa. „Við höfum rætt þessi mál fram og til baka í langan tíma, nú er kominn tími til að gera það sem hefur verið rætt. Þar þurfa stjórnvöld einnig að axla ábyrgð, leggja línurnar og taka ákvarðanir um framtíðarsýnina í góðu samstarfi við orkufyrirtækin,“ sagði Árni Hrannar.

Orka náttúrunnar þakkar öllum fyrirlesurum og gestum ráðstefnunnar fyrir þátttökuna. Markmið og framtíðarsýn ON er að halda áfram að framleiða heitt vatn og rafmagn á ábyrgan og umhverfisvænan hátt og stuðla þannig að sjálfbærum lífsgæðum fyrir komandi kynslóðir og samfélaginu öllu til heilla.