Fjölmiðlar hafa að undanförnu fjallað um hækkað raforkuverð og ástæður hækkana. Hjálmar Helgi Rögnvaldsson, forstöðumaður Viðskiptaþróunar og orkumiðlunar hjá Orku náttúrunnar, var í viðtali í hádegisfréttum RÚV í vikunni þar sem hann ræddi málið og sagði erfitt að segja til um hvort og að hve miklu leyti hækkun sem varð á heildsölumarkaði í nóvember skili sér áfram til neytenda.

Framleiðendur orkunnar hækkuðu sölutilboð sín og í október urðu engin viðskipti því kauptilboðin voru mun lægri. Í nóvember sáu kaupendur sem selja orkuna áfram til heimilanna sig tilneydda til að hækka kauptilboðin og kom þá fram um 30% hækkun frá síðasta markaðsverði. Hjálmar segir að þar hafi verið um lítið magn að ræða af rafmagni til afhendingar í upphafi næsta árs. Smásölufyrirtækin hafi flest hver verið búin að tryggja sér stóran hluta af rafmagninu áður og á lægri verðum.

Einnig ræddi Hjálmar lausnir til að tryggja forgangsorku til heimila og smærri fyrirtækja en í fyrra vetur átti að tryggja hana með eins konar neyðarlögum þar sem binda átti hendur framleiðenda og skylda þá til að selja inn á almenna markaðinn í sama hlutfalli og þeir hafa gert síðustu þrjú ár. Það varð ekki og í dag eru leiðirnar enn ómótaðar. Orku náttúrunnar telur að lausn sem starfshópur lagði til 2022 kunni að vera best til þess fallinn að leysa málið, sé hægt að finna henni lagalega stoð. Samkvæmt henni þyrfti Orka náttúrunnar að tryggja 17% af forgangsorku eða sama hlutfall og fyrirtækið framleiðir af heildinni.

„Samanber að Landsvirkjun framleiðir um 73% af allri raforku á Íslandi. Þá þyrftu þau að geta sinnt um 73% af heildarraforkuþörf almenns markaðar. En þau eru í dag bara að sinna um 50%. Þannig að það vantar töluvert þar upp á, um eina teravattstund til að þau gætu sinnt þessum skyldum. Það þyrfti mögulega að fara einhverja millileið þangað til þau hjá Landsvirkjun geta sinnt sinni hlutdeild inn á markaðinn. Við erum alveg til að í vinna með stjórnvöldum í að brúa bilið á einhvern hátt,“ segir Hjálmar Helgi Rögnvaldsson, forstöðumaður Viðskiptaþróunar og orkumiðlunar hjá Orku náttúrunnar.

Hlusta má á fréttina hjá RÚV hér og lesa hana hér.