Orka náttúrunnar og Landbúnaðarháskóli Íslands (LBHÍ) hafa undirritað viljayfirlýsingu um samstarf á sviði rannsókna og nýsköpunar. Markmiðið er að styrkja samvinnu í þágu sjálfbærrar auðlindanýtingar, umhverfisverndar og orkuskipta.

Samstarfið tekur bæði til þróunar sameiginlegra verkefna og gagnkvæms stuðnings í verkefnum hvors aðila fyrir sig. Með þessu eru stigin mikilvæg skref til að efla rannsóknir og nýsköpun sem stuðla að sjálfbærari framtíð.

Samstarfið felur m.a. í sér að:

·       Greina og greiða leið rannsóknar- og nýsköpunarverkefna er falla að sérsviði hvors aðila fyrir sig.

·       Meta möguleika á samstarfi í innlendum og alþjóðlegum rannsóknar- og nýsköpunarverkefnum.

·       Veita gagnkvæman stuðning við tengd verkefni með því að miðla þekkingu og reynslu.

·       Meta hvort verkefni geti verið staðsett í Glóð – fyrirhugaðri miðstöð nýsköpunar í Jarðhitagarði ON og nýtt auðlindir sem þar verða í boði.

Glóð, sem mun rísa í Jarðhitagarðinum, er hugsuð sem miðstöð nýsköpunar, samstarfs og þekkingamiðlunar. Markmið Glóðar er að skapa lifandi nýsköpunarsamfélag þar sem fyrirtæki, háskólasamfélagið og aðrir samstarfsaðilar geta unnið saman að þróun lausna sem styðja orkuskipti og sjálfbæra framtíð. Samstarf ON og LBHÍ er mikilvægt skref í þeirri uppbyggingu.

Þær Ingunn Gunnarsdóttir, leiðtogi nýsköpunar hjá Orku náttúrunnar, og Ragnheiður Inga Þórarinsdóttir, rektor LBHÍ skrifuðu undir viljayfirlýsinguna. Við það tækifæri sagði Ingunn að samstarfið opni á margvísleg tækifæri:
„Við hjá Orku náttúrunnar lítum á þetta samstarf sem mikilvægt skref í átt að aukinni þekkingu og nýsköpun á sviði sjálfbærrar auðlindanýtingar. Með því að sameina krafta okkar og sérþekkingu Landbúnaðarháskólans getum við þróað lausnir sem nýtast bæði samfélaginu og umhverfinu til framtíðar.“

Hér má lesa um Jarðhitagarð ON.