Ný og glæsileg vefsíða Jarðhitagarðs Orku náttúrunnar fór í loftið í dag.

Jarðhitagarðurinn stendur á rúmlega 100 hektara svæði við Hellisheiðarvirkjun og hýsir samfélag framsækinna fyrirtækja sem skilja mikilvægi hringrásarhugsunar. Þau nýta auðlindir svæðisins á ábyrgan og ábatasaman hátt og er sú uppbygging enn í örum vexti.

Í Jarðhitagarðinum er einnig unnið að uppbyggingu Nýsköpunarkjarna. Þar munu fyrirtæki, háskólar og frumkvöðlar fá einstakt tækifæri til að þróa og prófa lausnir sem stuðla að sjálfbærri og skilvirkri nýtingu orku og auðlinda. Innan kjarnans mun byggjast upp öflugur vettvangur fyrir jarðvarmatengdar rannsóknir og þróun. Orka náttúrunnar mun leggja til aðstöðu, tengingar fyrir raforku og aðgengi að auðlindum, auk sameiginlegs og sveigjanlegs skrifstofurýmis og rannsóknarstofu fyrir rannsóknar- og frumkvöðlaverkefni.