Á hverju sumri tekur landgræðsluhópur Orku náttúrunnar til starfa á virkjanasvæðum fyrirtækisins. Hópurinn sinnir mikilvægu starfi sem hefur það markmið að endurheimta landslag og gróður sem líkast því sem var fyrir framkvæmdir.

Orka náttúrunnar er þakklát fyrir að fá til sín frábært sumarstarfsfólk á hverju ári til að vinna þetta mikilvæga starf og leggja sitt af mörkum til náttúruverndar á Íslandi. Án þeirra væri þessi árangur ekki mögulegur. Landgræðsluhópurinn lauk störfum sínum þetta sumarið í síðustu viku.

„Við erum svo heppin að fá þennan flotta hóp til okkar. ON leggur ríka áherslu á góðan frágang og landgræðslu á öllum sínum svæðum og við höfum innleitt það verklag við allar framkvæmdir á grónu landi að taka upp gróður og nýta hann beint í frágang á framkvæmdastað eða á öðrum röskuðum svæðum,“ segir Magnea Magnúsdóttir, umhverfis og landgræðslustjóri hjá ON. „Við berum ómælda virðingu fyrir náttúrunni og höfum bæði gagn og gaman að því að vinna að þessum verkefnum sem krefjast þolinmæði, þekkingar og samvinnu við náttúruna.“

Verkefni landgræðsluhópsins eru margvísleg á hverju sumri. Þau planta víðigræðlingum, safna og dreifa fræslægju og endurheimta mosaþembur sem hafa verið fluttar til geymslu meðan framkvæmdir standa yfir. Með þessum aðferðum næst að græða upp svæði á náttúrulegan hátt, þannig að vistkerfi styrkist og jarðvegur verður betur varinn gegn rofi.

Umhverfisverkefni ON hafa verið árangursrík, vakið mikla athygli og verið fyrirmynd fyrir aðra framkvæmdaaðila. Landgræðslustarfið er óaðskiljanlegur hluti af ábyrgri orkuvinnslu ON og endurspeglar þá stefnu fyrirtækisins að láta náttúruna njóta vafans og hugsa til langs tíma.

Lesa meira um landgræðslu ON hér.

Hér fyrir neðan má sjá myndir sem sýna árangur af heydreifingu og grassáningu á Ölkelduhálsi