Kveðja til hleðslukvíðans

„Allt bendir til þess að hleðslukvíðinn, sem mörg okkar hafa þjáðst af, sé nú að lina tökin á landanum,“ segir Úlfar Linnet, forstöðumaður einstaklings- og fyrirtækjalausna hjá ON, í nýrri grein sem birtist á Vísi.

Í greininni fjallar Úlfar um athyglisverða þróun í notkun hraðhleðslustöðva víða um land. Gögn sýna að notkun þeirra jókst um 50% milli ára á sama tíma og rafbílum fjölgaði um 20%. Að hans mati bendir það til þess að fleiri kjósi nú að nota rafbílinn sem aðal ferðabíl fjölskyldunnar, einnig í lengri ferðir um landið.

„Ég tel líklegustu skýringuna á aukinni notkun vera þá að rafbíllinn hafi í sumar loksins rutt sér til rúms sem aðal ferðabíll fjölskyldunnar,“ skrifar Úlfar og bendir á að þótt hraðhleðslunetið hafi fyrir löngu gert mögulegt að aka hringinn í kringum landið hafi tekið tíma fyrir tæknina og innviðina að vinna bug á hleðslukvíðanum.

Í greininni rifjar hann upp að fyrir átta árum hafi verið auglýst að hraðhleðslunetið væri orðið nægilega öflugt til að aka rafbílum um allt land. Þó hafi reynslan sýnt að það tæki tíma fyrir notendur að treysta tækninni til fulls.

„Miðað við þróunina í sumar er sterk vísbending um að sá dagur sé upp runninn,“ segir hann.

Rafbíll betri fyrir umhverfið og budduna

Úlfar lýsir jafnframt eigin reynslu af rafbílaferðalögum og hvernig tækniframfarir hafa breytt upplifuninni á undanförnum árum. Hann minnist þess þegar ökumenn þurftu að spara rafmagn með því að draga úr notkun miðstöðvarinnar, en segir að sú tíð sé liðin.

„Nú er aldrei of kalt í bílnum og ef mér verður of heitt þá skrúfa ég bara niður rúðuna og hleypi kalda loftinu inn,“ skrifar hann og bætir við að rafbíllinn sé ekki aðeins betri fyrir umhverfið heldur einnig budduna og samlyndi fjölskyldunnar á ferðalögum.

Grein Úlfars varpar ljósi á hvernig aukin uppbygging hleðsluinnviða, betri tækni og breytt viðhorf notenda virðast saman hafa stuðlað að því að rafbíllinn sé í auknum mæli orðinn sjálfsagður kostur fyrir ferðalög um landið.

Alla greinina má lesa á Vísi.