Orka náttúrunnar hefur ráðið Ingólf Örn Guðmundsson í starf forstöðumanns Sölu- og viðskiptaþróunar og Hörpu Pétursdóttur sem Aðstoðarkonu framkvæmdastýru. Þá hefur Hjálmar Helgi Rögnvaldsson fengið nýtt hlutverk sem yfirmaður Viðskiptaþróunar og orkumiðlunar.

Orka náttúrunnar hefur ráðið Ingólf Örn Guðmundsson í starf forstöðumanns Sölu- og viðskiptaþróunar og Hörpu Pétursdóttur sem Aðstoðarkonu framkvæmdastýru. Þá hefur Hjálmar Helgi Rögnvaldsson fengið nýtt hlutverk sem yfirmaður Viðskiptaþróunar og orkumiðlunar.

Stofnandi félags kvenna í orkumálum

Harpa Pétursdóttir er lögfræðingur að mennt frá Háskólanum í Reykjavík. Hún hefur starfað í orkugeiranum frá árinu 2010 þegar hún hóf störf hjá Orkustofnun. Þar bar hún ábyrgð á raforkueftirliti stofnunarinnar og síðar öðrum lögfræðilegum málum svo sem leyfisveitingum, eftirliti með auðlindanýtingu, gerð frumvarpa og reglugerða sem og ráðgjöf til stjórnvalda í orkumálum.

Harpa mun gegna lykilhlutverki í verkefnum Orku náttúrunnar sem snúa að samskiptum og samvinnu við fjölbreyttan hóp hagaðila fyrirtækisins. Hún mun einnig starfa að mótun stefnu félagsins og skilaboða út á við.
Harpa hefur einnig reynslu af orkumálum frá störfum sínum hjá lögmannsstofunni BBA Legal þar sem hún sinnti orkumálum stofunnar. Harpa hefur einnig sinnt stundakennslu við lagadeildir Háskóla Íslands og Háskólans á Bifröst auk þess sem hún hefur setið í ýmsum nefndum og stjórnum. Harpa stofnaði árið 2016 félagið Konur í orkumálum og var stjórnarformaður þess í 6 ár. Hún er jafnframt varaformaður Nordic Energy Equality Network. Þá er Harpa Viðurkenndur stjórnarmaður og sinnir um þessar mundir námi til réttinda í verðbréfamiðlun.

27 ár í alþjóðlegu umhverfi viðskiptaþróunar og markaðsmála

Ingólfur Örn Guðmundsson hefur starfað í yfir 27 ár í alþjóðlegu umhverfi viðskiptaþróunar og markaðsmála. Lengstum hjá Marel, bæði í vöruþróun en aðallega leiddi hann alþjóðlega uppbyggingu markaðsstarfs fyrirtækisins. Ingólfur starfaði einnig hjá Skaganum 3X sem framkvæmdastjóri viðskiptaþróunar og þá hefur hann starfað sem ráðgjafi fyrir íslensk og erlend fyrirtæki. Ingólfur er með B.Sc. gráðu í vöruhönnun frá Ohio State University og MBA gráðu frá Háskóla Íslands.

Sala og viðskiptaþróun er nýtt svið innan Orku náttúrunnar þar sem helstu verkefnin snúa að kaupum og sölu á raforku, öflun nýrra viðskiptavina, uppbyggingu Jarðhitagarðs og ýmiskonar vöruþróun. Þar undir er Viðskiptaþróun og orkumiðlun og er Hjálmar Helgi Rögnvaldsson yfirmaður þess en hann hefur starfað hjá ON frá árinu 2014. Hjálmar er með M.Sc. gráðu í rafmagnsverkfræði og hefur mikla þekkingu og reynslu á þessu sviði.

Öflugt fólk í spennandi verkefnum

„Hlutverk viðskiptaþróunar og orkumiðlunar er afar mikilvægt fyrir Orku náttúrunnar. Eitt stærsta verkefnið okkar snýr að uppbyggingu og rekstri Jarðhitagarðs ON við Hellisheiðarvirkjun. Við einbeitum okkur einnig að greiningum viðskiptatækifæra á sviði orkumála, kaup og sölu á raforku á heildsölumarkaði auk samninga og samskipta við núverandi og mögulega nýja viðskiptavini á orkumarkaði,“ segir Hjálmar Helgi Rögnvaldsson yfirmaður Viðskiptaþróunar og orkumiðlunar.

„Við erum afar ánægð með að hafa fengið þetta öfluga fólk til liðs við okkur. Ingólfur hefur mikla reynslu úr hinu alþjóðlega umhverfi sem mun nýtast okkur vel m.a. í því verkefni að laða fleiri spennandi fyrirtæki í Jarðhitagarðinn okkar. Harpa er með mikla reynslu úr orkubransanum og hefur verið að gera frábæra hluti m.a. með konum í orkumálum. Hjálmar þekkjum við auðvitað vel og verður spennandi að sjá hann í nýju hlutverki,“ segir Berglind Rán Ólafsdóttir framkvæmdastýra Orku náttúrunnar.

Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.