Fréttir
20. ágúst 2021

Hleður í Baulu á leið í bústaðinn

Alli Jörundsson rafbílaeigandi og fyrsti kúnni nýjustu hraðhleðslustöðva ON við Baulu í Borgarfirði segist alls ekki vera að hlaða þar í síðasta skiptið.

„Nei þessar stöðvar eru á mjög góðum stað fyrir okkur sem erum með sumarbústað hér í Borgarfirðinum. Stöðvarnar í Borgarnesi eru orðnar mjög uppteknar þegar traffíkin er mikil. Það er því alveg frábært að fá þessar stöðvar með svona margar tengingar.“

Nýju stöðvarnar sem eru tvær eru staðsettar við hina víðfrægu vegasjoppu Baulu og eru 150 kw hvor. Alls geta fjórir bílar hlaðið í einu og fengju þá 75 kw hver bíll.

Og Alli er ekki nýgræðingur þegar kemur að rafbílum enda fékk hann sinn fyrsta rafbíl, Nissan Leaf, fyrir um þremur árum og skipti svo yfir í þann nýjasta snemma árs.

„Hann er með lengri drægni og því þarf ekki að hlaða hann eins oft. Við komumst í raun fram og til baka úr bænum og upp í bústað en ef maður er hérna eitthvað þá er flott að geta hlaðið hér.“

Það fer ekki á milli mála að Alli er stoltur rafbílaeigandi og svarið er stutt og ákveðið þegar hann er spurður hvort komi til greina að skipta aftur yfir í annan orkugjafa?

„Nei það held ég ekki. Maður fer ekkert til baka.“

Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.