Ákveðið hefur verið að taka aftur upp lögreglurannsókn á umhverfisóhappi sem varð við Andakílsá fyrir rúmum tveimur árum. Lífríki Andakílsár virðist vera að rétta úr kútnum.

Það var vorið 2017 að verið var að undirbúa viðhald inntaksstíflu Andakílsárvirkjunar og hreinsun á seti úr inntakslóninu að mikill aur úr lóninu rann í farveg árinnar. Orka náttúrunnar, sem á og rekur Andakílsárvirkjun, tók þegar ábyrgð á mistökunum og hefur átt í samstarfi við heimamenn og vísindafólk um aðgerðir til að reisa lífríki árinnar við að nýju, einkum laxastofninn. Samhliða vann ON nákvæma greiningu á atburðarásinni til að koma í veg fyrir að slíkt endurtæki sig.

Aðgerðirnar virðast gefa góða raun en um 30 þúsund laxaseiðum, sem ræktun var hafin á úr stofninum í ánni þegar eftir óhappið, var sleppt í ána nú í vor. Að ráði fiskifræðinga hefur ekki verið veitt í ánni síðustu sumur en ráðgert er að hefja stangaveiði að nýju sumarið 2020. Þá verður öðrum 30 þúsund seiðum sleppt í ána.

Lögreglustjórinn á Vesturlandi hafði óhappið til rannsóknar meðal annars með tilliti til þess hvort fyrirtækið hefði gerst brotlegt við lög með vangá við aðgerðir við inntakslónið. Eftir gagnaöflun og skýrslutökur var sú rannsókn felld niður þegar ekki þótti líklegt að um lögbrot væri að ræða. Sú ákvörðun var kærð til ríkissaksóknara sem nú hefur tilkynnt ON að embættið hafi falið lögreglustjóranum að rannsaka málið frekar.

Orka náttúrunnar mun hér eftir sem hingað til vinna með heimafólki og vísindafólki að vöktun og eflingu lífríkis árinnar og vera yfirvöldum innan handar um öflun frekari gagna um atburðina.

Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.