Jarðhitasýningin og Orka náttúrunnar buðu á dögunum til leiðsagnar um Jarðhitasýninguna á íslensku táknmáli. Þetta er annað árið í röð sem Sigurlín Margrét Sigurðardóttir (Magga) tekur að sér leiðsögn um sýninguna.

Rúmlega 30 manns mættu í Hellisheiðarvirkjun síðastliðinn sunnudag í leiðsögnina og fengu ítarlega og góða leiðsögn um sýninguna þar sem þau fræddust um starfsemina í virkjuninni, Carbfix, Jarðhitagarðinn og jarðfræði Íslands.

Magga var starfsfólki Jarðhitasýningar þakklát fyrir að bjóða upp á táknmálsleiðsögn og sagði það frábært framtak.

„Það skiptir miklu máli að táknmálsfólk hafi aðgang að fræðslu, upplifun og leiðsögn á sínu eigin máli, táknmáli. Slík skref efla aðgengi, jafnræði og samfélag allra,“ sagði Magga eftir viðburðinn sem þótti afar vel heppnaður.