Fréttir
26. júní 2021

Árétting vegna ummæla framkvæmdastjóra Ísorku

Vegna fréttaflutnings í gær og í dag af úrskurði Kærunefndar útboðsmála vil ON koma á framfæri eftirfarandi leiðréttingum og áréttingum:

Reykjavíkurborg fór fram á að straumur yrði tekinn af götuhleðslum ON í borginni á grundvelli þess að Ísorka sendi bréf á kærunefnd útboðsmála í liðinni viku 22.06 þar sem vakin var athygli á því að Ísorka liti svo á að ekki væri leyfilegt að gefa rafmagn á stöðvunum og nefndinni bent á heimildir sínar til að beita dagsektum

Frá þessu greindi ON í fréttatilkynningu í gær.

Í kjölfarið birtust viðbrögð framkvæmdastjóra Ísorku víða í fjölmiðlum og á Facebook þar sem hann sagði þetta alrangt. Var því haldið fram að Ísorka hefði ekki átt nein samskipti við Kærunefndina og það væri þeim að meinalausu að götuhleðslurnar væru opnar þar til niðurstaða kæmist í málið.

Eftir fjölda samtala við framkvæmdarstjóra Ísorku í gær og í dag hefur komið í ljós að hann fór með rangt mál og hefur hann beðið framkvæmdastýru ON afsökunar á því. Lögmaður Ísorku sendi umrætt bréf á Kærunefndina eins og ON hefur greint réttilega frá.

ON telur afar mikilvægt að þetta komi fram í umræðunni og stendur því við fyrri fréttatilkynningu af málinu frá því í gær.

Líkt og fram hefur komið hefur Reykjavíkurborg óskað eftir frestun réttaráhrifa til Kærunefndar útboðsmála og vonumst við til þess að fallist verði á þá frestun.

ON telur afar brýnt að niðurstaða komist í málið sem allra fyrst þannig að unnt verði að veita nauðsynlega þjónustu í götuhleðslum til rafbílaeigenda í borginni á næstu dögum.

Málið er afar íþyngjandi fyrir fjölmarga rafbílaeigendur sem hafa nýlega fjárfest í umhverfisvænum rafbíl og gert ráð fyrir því að geta reitt sig á þessa þjónustu.

Þá vill ON minna viðskipti sína á að straumur verður rofinn á öllum götuhleðslum ON á mánudag 28.júní en áfram verður hægt að hlaða á hraðhleðslustöðvum ON.

Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.