Breytingar í stafrænni tækni eru gríðarlega örar og margar nýjar stafrænar leiðir í boði til að eiga í samskiptum við viðskiptavini. Kannanir sýna að fólk vill almennt geta nálgast þjónustu í gegnum netið hvar sem er og hvenær sem er og mikilvægt fyrir þjónustufyrirtæki að sinna því kalli. Tækninýjungar á borð við gervigreind, vélmenni og nettenging hluta (internet of things) hafa rutt eldri aðferðum úr vegi og skapað mörg tækifæri fyrir fyrirtæki og neytendur.

Orka náttúrunnar leggur nú í þessa vegferð þar sem ætlunin er meðal annars að bæta framleiðsluferla með aukinni sjálfvirkni, nýjum möguleikum til eftirlits og betri ákvarðanatöku. Því hefur fyrirtækið auglýst eftir manneskju til að varða leiðina inn í græna stafræna framtíð á spennandi raforkumarkaði.

„Við vitum að stafræn miðlun og þjónusta verður lykilþáttur í samkeppnishæfni á raforkumarkaði í framtíðinni og það er ekki spurning hvort heldur hvenær fyrirtæki nýti tækifærin sem í þessari umbyltingu felast. Stafræn tækni þróast hratt og það er í raun ekki mögulegt að sjá fyrir hverslags tækni verður í boði eftir 4 til 5 ár. Við viljum sjá þróunina í þá átt að tæknin hjálpi okkur að minnka kolefnisspor einstaklinga og fyrirtækja samhliða bættri þjónustu og rekstri“, segir Berglind Rán Ólafsdóttir, framkvæmdastýra ON.

Á meðal kosta sem fylgja stafrænni umbreytingu eru nýjar leiðir til að eiga samskipti við viðskiptavini, nýjungar í mannauðsmálum og aukin tækifæri til að nýta upplýsingar og gögn.

„Auk þess að hafa þekkingu á stafrænni tækni, rekstri, þjónustu, og neytendahegðun þarf viðkomandi að hafa brennandi áhuga á nýsköpun, umhverfismálum og snjöllum lausnum“, segir Berglind.

Nánari upplýsingar má finna með því að smella hér.

Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.