Denisa Saková, efnahagsmálaráðherra og aðstoðarforsætisráðherra Slóvakíu, heimsótti Hellisheiðarvirkjun í gær ásamt sendinefnd. Þar fékk hún kynningu á starfsemi ON, jarðhitanýtingu og Jarðhitagarði ON frá þeim Yagiz Bostanci vísindamiðlara Jarðhitasýningar og Ingunni Gunnarsdóttur leiðtoga nýsköpunar auk þess sem Valgerður B. Eggertsdóttir leiðtogi hagaðilatengsla og sjálfbærni svaraði spurningum ráðherrans sem var mjög ánægð með heimsóknina til okkar.

Saková var í heimsókn hér á landi til að kynna sér nýtingu Íslendinga á jarðhita en í Slóvakíu finnst jarðhiti á nokkrum stöðum, sem hefur hingað til einkum verið nýttur til heilsubaða en lítið til hitunar eða orkuframleiðslu.

Eftir heimsóknina í Hellisheiðarvirkjun hitti Saková Jóhann Pál Jóhannsson umhverfis-, orku- og loftslagsráðherra en hún heimsótti einnig Grindavík á meðan hún var hér á landi.