Orka náttúrunnar hefur hlotið viðurkenninguna Fyrirmyndarfyrirtæki í rekstri 2025 samkvæmt lista Keldunnar og Viðskiptablaðsins. Þetta er í annað sinn í röð sem fyrirtækið fær þessa viðurkenningu en ON hlaut sama heiður í fyrra.

Viðurkenningin er veitt fyrirtækjum sem skara fram úr í rekstri og uppfylla ströng viðmið um heilbrigðan og traustan rekstur. Til að teljast fyrirmyndarfyrirtæki þurfa félög að sýna fram á jákvæða afkomu, bæði tekjur og eignir þess þurfa að vera umfram ákveðið lágmark og eiginfjárhlutfall þarf að vera hærra en 20%. Auk þess er sömuleiðis tekið tillit til ýmissa annarra þátta.

Að Orka náttúrunnar hljóti þessa viðurkenningu tvö ár í röð er staðfesting á stöðugu og góðu starfi fyrirtækisins.

„Við erum stolt af því að hljóta þessa viðurkenningu annað árið í röð. Það er vitnisburður um góða liðsheild, traustan rekstur og þá ábyrgð sem við berum gagnvart samfélaginu,“ segir Árni Hrannar Haraldsson, framkvæmdastjóri ON.

ON mun áfram leggja áherslu á stöðugleika, fagmennsku og sjálfbærni í rekstri með það að markmiði að vera áfram fyrirmynd í orkugeiranum.