Orka náttúrunnar tók í dag við viðurkenningu Íslensku ánægjuvogarinnar og er númer eitt á markaði raforkusala á Íslandi samkvæmt niðurstöðu mælinga. Þetta er sjöunda árið í röð sem Orka náttúrunnar hlýtur viðurkenninguna.

Að vera efst í ánægjuvoginni sjöunda árið í röð er skýr staðfesting á því að áhersla Orku náttúrunnar á góða þjónustu, skýr samskipti og traust samband við viðskiptavini skilar raunverulegum árangri.

Viðurkenningin er jafnframt hvatning til að halda áfram á þeirri vegferð sem hófst fyrir 12 árum þegar Orka náttúrunnar var stofnuð, að setja viðskiptavininn í öndvegi og þróa þjónustu sem mætir þörfum heimila, fyrirtækja og rafbílaeigenda.

Í huga Orku náttúrunnar er árangurinn engin tilviljun enda hefur markvisst verið lögð áhersla á að veita faglega ráðgjöf, aðgengilega þjónustu og lausnir sem auðvelda viðskiptavinum að taka upplýstar ákvarðanir um raforkunotkun.

„Við erum afskaplega stolt af þessum árangri. Viðurkenningin er risastórt hrós til okkar frábæra starfsfólks sem sinnir samskiptum og þjónustu við viðskiptavini Orku náttúrunnar sem eru tugþúsundir talsins. Þjónusta er í öndvegi í öllum okkar störfum og metnaður starfsfólks fyrir því að veita framúrskarandi þjónustu er gríðarlegur,“ segir Árni Hrannar Haraldsson framkvæmdastjóri ON.

Markmið Íslensku ánægjuvogarinnar  er að veita fyrirtækjum samræmdar mælingar á ánægju viðskiptavina og þeim þáttum sem hafa áhrif á hana, svo sem ímynd, mat á gæðum þjónustu og tryggð viðskiptavina. Slíkar mælingar eru taldar afar mikilvægar, enda hafa rannsóknir sýnt fram á að ánægja viðskiptavina tengist sterklega árangri fyrirtækja til lengri tíma.

„Við erum afar þakklát fyrir þetta traust og viljum þakka viðskiptavinum okkar kærlega fyrir viðurkenninguna. Hún er okkur hvatning til að halda áfram að þróa þjónustu okkar, bæta upplifun viðskiptavina og setja þá í fyrsta sætið,“ bætir Árni Hrannar við.

Takk fyrir okkur kæru viðskiptavinir ON!