Losun frá virkjunum Orku náttúrunnar dregst saman um tæplega fjórðung

Losun frá virkjunum Orku náttúrunnar hefur dregist saman um 24% milli ára. Helsta skýringin er ný og stærri lofthreinsistöð við Hellisheiðarvirkjun sem tekin var í notkun í fyrra sem fangar nær allt gas frá virkjuninni og bindur það varanlega í bergi.

Á sama tíma og framkvæmdir í orkuiðnaði geta tímabundið aukið losun sýna nýjar tölur frá Orku náttúrunnar að tæknilausnir til gasföngunar og bindingar geta snúið þróuninni við og dregið hratt úr losun.

Nýja stöðin, sem nefnist Steingerður, tekur við bæði koltvísýringi og brennisteinsvetni frá Hellisheiðarvirkjun. Gasið er leyst upp í vatni og dælt niður í jarðlög þar sem það steingerist og binst varanlega.

Viljum vera í fremstu röð
„Við framleiðum og seljum raforku sem byggir á sjálfbærri nýtingu náttúruauðlinda. Það skiptir okkur því miklu máli að þróa og innleiða lausnir sem draga úr umhverfisáhrifum orkuframleiðslunnar,“ segir Árni Hrannar Haraldsson, framkvæmdastjóri Orku náttúrunnar.

„Þessi þróun styrkir líka samkeppnisstöðu okkar. Fyrirtæki og samfélög sem vilja kaupa sjálfbæra orku vilja vita hvernig hún er framleidd, og þar viljum við vera í fremstu röð.“

Carbfix tæknin bindur gasið varanlega

Orka náttúrunnar er hluti af fyrirtækjum Orkuveitunnar ásamt Carbfix.

„Við erum nú að fanga nær allt gas frá Hellisheiðarvirkjun og binda það í bergi með Carbfix-tækninni, sem var þróuð innan Orkuveitunnar,“ segir Snorri Jökull Egilsson, deildarstjóri umhverfis- og loftslagsmála hjá Orkuveitunni.

„Þetta er tækni sem hefur skipt sköpum í loftslagsmálum á Íslandi svo það er stór áfangi að ná að fullskala þessa lausn við stærstu jarðhitavirkjun Evrópu. Loksins fáum við að sjá þennan árangur raungerast á þessum skala eftir mikla vinnu og fjárfestingar en ekki síst tíma, þar sem við hófum niðurdælingu á tilraunaskala árið 2012,“ segir Snorri.

Áhrifin verða enn meiri á þessu ári

Hellisheiðarvirkjun hefur frá opnun staðið fyrir stærstum hluta losunar í orkuframleiðslu Orkuveitunnar í heild, um 40 þúsund tonnum af koltvísýringi á ári. Til samanburðar losna um 10 þúsund tonn frá Nesjavallavirkjun.

Steingerður var tekin í notkun um mitt ár 2025 og því náði stöðin aðeins hluta ársins í rekstri í fyrra. Á þessu ári verður stöðin í fullum rekstri allt árið og þá mun losunin minnka enn frekar ef allt gengur samkvæmt áætlun.

Bætir einnig loftgæði

Ekki er aðeins verið að fanga koltvísýring heldur líka brennisteinsvetni, sem margir þekkja af lyktinni frá jarðhitavirkjunum. Það skiptir miklu máli fyrir íbúa á höfuðborgarsvæðinu að þessi efni séu bundin í jörðu í stað þess að fara út í andrúmsloftið.

Á Nesjavöllum hefur gasniðurdæling einnig verið prófuð á tilraunaskala frá árinu 2023.

Orkuskipti í rekstri

Orka náttúrunnar, sem og Orkuveitan, hefur samhliða fjárfestingum í gasföngun lagt aukna áherslu á orkuskipti í eigin rekstri. Um 60 prósent bíla í bílaflota fyrirtækisins eru nú rafknúnir og allir fólksbílar Orkuveitunnar eru rafbílar. Markmiðið er að flotinn verði að fullu knúinn endurnýjanlegum orkugjöfum árið 2030.

Nær öll borverkefni við jarðhitavirkjanir hafa einnig verið keyrð á rafmagni frá árinu 2017 og í nýju borútboði fyrir næstu ár er einnig gerð krafa um rafmagnsbor í verkefnum tengdum hitaveitu og köldu vatni.

Stál stærsti losunarþátturinn á eftir virkjunum

Næst á eftir jarðhitavirkjunum tengist stærsti losunarþáttur Orkuveitunnar innkaupum á vörum og efni, sérstaklega stállögnum.

Verið er að vinna að langtímamarkmiðum um að kaupa grænni efni, til dæmis stál framleitt með vistvænni hætti. Slík framleiðsla er enn í litlum mæli á heimsvísu en Orkuveitan vill vera tilbúin þegar hún verður aðgengileg á stærri skala.

Loftslagsbókhald Orkuveitunnar 2025

Ársreikningur Orkuveitunnar 2025