Árni Hrannar Haraldsson, framkvæmdastjóri Orku náttúrunnar, tók þátt í pallborðsumræðum á ráðstefnunni Our Climate Future 2025 sem haldin var í Brussel 14. október.

Yfirskrift umræðanna var Jarðvarmi sem drifkraftur fyrir samkeppnishæfni, kolefnishlutleysi og orkuöryggi Evrópu (e. Geothermal Energy as a Driver for European Competitiveness, Decarbonisation and Energy Security) og fjölluðu um hvernig reynsla Íslands í nýtingu jarðvarma getur stutt við orkuskipti, samkeppnishæfni og orkuöryggi í Evrópu.

Hvati að orkuskiptum

Árni Hrannar sat í pallborði ásamt Tómasi Sigurðssyni, forstjóra HS Orku, Eddu Sif Pind Aradóttur, framkvæmdastýru Carbfix, og Davide Amato, sérfræðingi hjá framkvæmdastjórn Evrópusambandsins. Ráðstefnan var haldin á vegum Íslandsstofu og Grænvangs, í samstarfi við sendiráð Íslands í Brüssel, og sóttu hana yfir 150 fulltrúar úr atvinnulífi, stjórnsýslu og fræðasamfélagi.

Í máli Árna Hrannars kom fram að jarðhiti hafi verið burðarás í orkuskiptum Íslands og grundvöllur fyrir bæði orkuöryggi og nýsköpun. Hann sagði að með jarðhita hefði Íslendingum tekist að byggja upp sjálfbært orku- og efnahagskerfi sem væri nær alfarið knúið af innlendum, endurnýjanlegum orkugjöfum.
„Jarðvarminn hefur verið hvati að orkuskiptum á Íslandi, allt frá því að nýting hans til húshitunar hófst og til þeirra orkuskipta sem nú eru í gangi og Orka náttúrunnar er í fararbroddi fyrir. Jarðvarmanýting á Íslandi sýnir hvað er hægt að ávinna þegar náttúran er nýtt á ábyrgan hátt og verðmæti sköpuð í sátt við hana,“ sagði Árni Hrannar.

Ný tækifæri til þróunar og þekkingarsköpunar

Árni Hrannar  kynnti meðal annars Jarðhitagarðinn á Hellisheiði sem lifandi dæmi um hringrásarhagkerfi þar sem afurðir frá virkjun eru nýttar áfram í nýsköpun, kolefnisbindingu og þróun græns iðnaðar. Þar er nú unnið að stofnun nýsköpunarmiðstöðvarinnar Glóðar, sem mun efla samstarf fræðasamfélags, nýsköpunarfyrirtækja og iðnaðar um nýtingu jarðhita og skapa ný tækifæri til þróunar og þekkingarsköpunar á þessu sviði.

Hann talaði einnig um lofthreinsistöðina Steingerði sem opnuð var fyrir nokkrum mánuðum og markaði þau tímamót að Hellisheiðarvirkjun verður ein af fyrstu jarðvarmavirkjunum heims til að verða nær kolefnislaus.

Hægt að læra af Íslendingum

Í pallborðinu var rætt um mikilvægi alþjóðlegrar samvinnu í jarðhitarannsóknum og þróun, þar sem Ísland hefur upp á margt að bjóða. Ekki síst reynslu sem aðrir geta lært af, bæði af árangri og mistökum fyrri tíma. Þá var fjallað um IDDP (Iceland Deep Drilling Project ) og mikilvægi þess til framtíðar og sérstaklega í ljósi þess að verið er að vinna að djúpborunarverkefnum í ýmsum heimshlutum.

Þeir Jóhann Páll Jóhannsson, umhverfis-, orku- og loftslagsráðherra, og Dan Jørgensen, framkvæmdastjóri orku- og húsnæðismála ESB, fluttu báðir erindi á Our Climate Future 2025 og kom fram í máli þeirra að virkjun jarðhita geti leikið mikilvægt hlutverk í orkuskiptum Evrópu, en það kalli á að stjórnvöld sýni frumkvæði, marki skýra stefnu og móti regluverk sem styðji kröftuglega við öflun endurnýjanlegrar orku.

Ráðstefnan var áminning um að framtíð orkuöryggis og sjálfbærrar nýsköpunar í Evrópu byggir á samvinnu þjóða og ábyrgri nýtingu náttúrulegra auðlinda þar sem jarðvarminn gegnir lykilhlutverki.