„Það að bílaleigur taki ekki valdið úr höndum leigutaka sinna og bjóði raunverulega upp á þann valkost og helst þann einan, að ferðast um landið okkar á sjálfbæran hátt skiptir máli fyrir samfélagið. Það að fjölmiðlar fjalli fagmannlega um verkefni sem fæstir hafa skilning á ennþá skiptir máli. Það að orkuöflun fái framgang með skjótvirkari hætti en við höfum vanist undanfarin ár skiptir máli. Það að við höldum áfram að knýja orkuskiptin og flýta þeim svo frekast sé unnt skiptir máli því við eigum ennþá mjög langt í land þegar kemur að loftslagsmálum.“  

Þetta kom fram í  erindinu „Steingerður á rafmagnsbílnum“ sem Tinna Jóhannsdóttir, forstöðumaður markaðsmála og sjálfbærni hjá Orku náttúrunnar flutti á fundi Orkuveitunnar, Fyrir loftslagið, sem haldinn var í Grósku þann 10. október. Tilefni fundarins voru starfslok Hólmfríðar Sigurðardóttur, frumkvöðuls í loftslags- og umhverfismálum, sem hefur haft djúpstæð áhrif á stefnu og aðgerðir Orkuveitunnar og dótturfyrirtækja hennar á undanförnum tveimur áratugum.

Tinna sagði einnig í erindi sínu að þar sem við búum öll í samfélagi þá hafi gjörðir og athafnir allra þegna samfélagsins áhrif. „Það að Sigrún nágranni minn velji sér rafmagnsbíl umfram bíl sem gengur fyrir jarðefnaeldsneyti, skiptir máli. Það að starfsfólk Orkuveitunnar, Carbfix og Orku náttúrunnar setji sér metnaðarfull markmið og hrindi í framkvæmd verkefnum eins og Steingerði og Silfurbergsverkefninu skiptir líka gríðarlega miklu máli fyrir samfélagið. Það að fyrirtæki velji að rafvæða allan bílaflotann sinn skiptir samfélagið máli. Það að ráðherrar og hæstráðendur þessa lands búi þannig um hnútana að það sé hvati - eða jafnvel kvaðir - til að lækka kolefnisfótspor fyrirtækja með margvíslegum hætti, skiptir máli.“

Í lok erindis beindi Tinna orðum sínum sérstaklega til Hólmfríðar og þakkaði henni fyrir brautryðjendastarf í þágu náttúrunnar.

„Hólmfríður er brautryðjandi. Hún ruddi veginn, hlúði að náttúrunni og bar ómælda virðingu fyrir henni á öllum sínum starfsferli,svo mikið og vel að stundum þótti fólki um og of. Áhrifa hennar gætir víða og þeirra mun gæta um ókomna framtíð.“

Tinna lauk máli sínu á því að þakka Hólmfríði innilega fyrir sitt framlag og undirstrikaði að Orka náttúrunnar muni áfram standa vörð um náttúruna og auðlindirnar, bæði í orðum og gjörðum.

Starfsfólk Orku náttúrunnar tekur undir þessi þakklætisorð og segjum við líka: "Takk fyrir allt þitt, Fríða!".

Sævar Freyr Þráinsson, forstjóri Orkuveitunnar flutti einnig erindi.

Tinna þakkaði Hólmfríði fyrir hennar framlag til umhverfis- og loftslagsmála.