Norðurál hefur upplýst um að greiðslufall verði af hálfu fyrirtækisins vegna endurtekinna bilana í álveri þess á Grundartanga. Norðurál er stærsti einstaki viðskiptavinur Orku náttúrunnar og tekur við stórum hluta þeirrar raforku sem ON framleiðir. Samkvæmt upplýsingum frá Norðuráli gætu tafir á greiðslum staðið út árið 2026. Stjórn Orkuveitunnar, móðurfélags Orku náttúrunnar, samþykkti í dag breytingar á fjárhagsspá samstæðunnar, sem gefin var út 7. október síðastliðinn, vegna þessa.

Samkvæmt raforkukaupasamningi Orku náttúrunnar og Norðuráls ber fyrirtækinu að greiða fyrir umsamda orku, hvort sem fyrirtækið nýtir hana eða ekki. Nú liggur hinsvegar fyrir yfirlýsing um að fyrirtækið muni einungis greiða fyrir það rafmagn sem álverið getur tekið á móti meðan gert er við bilanir í því.

Árni Hrannar Haraldsson, framkvæmdastjóri Orku náttúrunnar, segir að staðan geri það að verkum að fyrirtækið þurfi að sýna varfærni í fjárfestingum og rekstri á næstu misserum.

„Við þurfum að bregðast við þessari stöðu af ábyrgð. Við stöndum þó fjárhagslega sterkt og höldum áfram að tryggja afhendingu og þjónustu við okkar viðskiptavini,“ segir Árni Hrannar. Hann segir jafnframt að tímabundið verði að draga saman seglin og forgangsraða verkefnum „Það þýðir að við munum hagræða í rekstri og fresta eða endurskoða verkefni sem þola bið.“ 

Hagnaður samstæðunnar á uppsveiflu

Jafnframt samþykkti stjórn Orkuveitunnar árshlutareikning fyrstu níu mánaða ársins 2025. Hagnaður samstæðunnar nam 6,7 milljörðum króna á tímabilinu, samanborið við 5,1 milljarð á sama tíma í fyrra, sem er 31% afkomubati milli ára. Rekstrartekjur jukust um 3,9% og rekstrarkostnaður hækkaði um 2,0%.

Í samstæðu Orkuveitunnar eru, auk móðurfélagsins, Veitur, Orka náttúrunnar, Ljósleiðarinn og Carbfix. Veltufé frá rekstri nam 22,1 milljarði króna og styrkir það getu samstæðunnar til að standa undir áframhaldandi fjárfestingum í mikilvæga innviði.

Orka náttúrunnar mun fylgjast náið með framvindu mála og meta áhrifin á rekstur eftir því sem upplýsingar skýrast.