Orka náttúrunnar og Íslenski sjávarklasinn hafa undirritað viljayfirlýsingu um samstarf á sviði nýsköpunar sem tengist sjálfbærri auðlindanýtingu, umhverfisvernd og orkuskiptum. Með samstarfinu vilja aðilarnir efla tengsl milli Glóðar og bláa hagkerfisins, deila þekkingu og skapa vettvang fyrir þróun nýrra verkefna sem stuðla að sjálfbærni og nýsköpun. 

Orka náttúrunnar rekur Jarðhitagarð við Hellisheiðarvirkjun, grænan iðngarð þar sem fyrirtæki nýta jarðhitaafurðir með áherslu á hringrásarhugsun og sjálfbæra nýsköpun. Glóð, sem mun rísa í Jarðhitagarðinum, er hugsuð sem miðstöð nýsköpunar, samstarfs og þekkingamiðlunar og þar verður aðstaða fyrir jarðvarmatengdar rannsóknir og nýsköpun. 

Íslenski sjávarklasinn hefur um árabil verið leiðandi í uppbyggingu samfélags fyrirtækja, frumkvöðla og fræðasamfélags á sviði bláa hagkerfisins. Í Húsi sjávarklasans fá sprotafyrirtæki aðstöðu til að þróast, efla tengslanet sitt og skapa ný tækifæri tengd sjávarútvegi og tengdum greinum. Sjávarklasinn vinnur náið með fjölda fyrirtækja, styður frumkvöðla og fjárfestir í nýsköpun. 

Markmið samstarfsins eru m.a. að nýta reynsluna úr Húsi sjávarklasans við uppbyggingu Glóðar, gera Glóð að vettvangi fyrir fyrirtæki sem sjá samlegð milli jarðhita, orku og bláa hagkerfisins og að vinna markvisst saman að þróun nýsköpunarverkefna með áherslu á sjálfbærni, ábyrga nýtingu auðlinda og orkuskipti. 

Þau Ingunn Gunnarsdóttir, leiðtogi nýsköpunar hjá Orku náttúrunnar, og Þór Sigfússon, stjórnarformaður Íslenska sjávarklasans, skrifuðu undir viljayfirlýsinguna.  

„Við hjá Orku náttúrunnar lítum á þetta samstarf sem mikilvægt skref í átt að aukinni þekkingu og nýsköpun á sviði sjálfbærrar auðlindanýtingar,“ segir dr. Ingunn Gunnarsdóttir, leiðtogi nýsköpunar hjá ON. „Með því að læra af reynslunni úr Húsi Sjávarklasans við uppbyggingu Glóðar getum við skapað lifandi nýsköpunarumhverfi þar sem hugmyndir geta kviknað og dafnað. Við sjáum mikil tækifæri í því að tengja saman orku og haf, tvo burðarstólpa íslensks hagkerfis.“