Metfjöldi gesta á Fjölskyldudegi ON

Fjölskyldudagur ON var haldinn síðastliðinn sunnudag í Jarðhitasýningunni á Hellisheiði. Viðburðurinn er árlegur og vex með hverju árinu því í ár mættu um 500 manns sem er töluvert meiri fjöldi en undanfarin ár.

Það var margt að upplifa og sjá því til viðbótar við það að gestir gátu upplifað undur jarðhitans í gegnum Jarðhitasýninguna þá voru Stjörnu-Sævar, Vísinda-Villi og Sirkus Íslands á staðnum. Börnin fengu andlitsmálningu og fígúrublöðrur, fóru í jarðhitabingó, grímusmiðju, gátu litað og skemmt sér við ýmsa afþreyingu.

Einnig var formlegt útgáfuhóf Forvitnisbókarinnar á fjölskyldudeginum en Forvitnisbókin er ný fræðslu-, lita- og þrautabók um jarðhitann og frábær fyrir forvitna krakka sem hafa gaman af því að lita. Forvitnisbókin þróaðist út frá Forvitnishorninu í Jarðhitasýningunni, Ninna Þórarinsdóttir teiknaði myndirnar og Kathryn Ann Teeter og teymið á Jarðhitasýningunni skrifaði textann.

Þessar frábæru myndir tala sínu máli og við hlökkum til að sjá fleiri gesti mæta að ári enda erfitt að finna betri og meira fræðandi fjölskylduskemmtun.