Töluverðar framkvæmdir hafa verið í gangi nærri Hellisheiðarvirkjun Orku náttúrunnar að undanförnu en unnið er að því að færa læk sem þar rennur á betri stað. Í gegnum tíðina hefur náttúrlegum farvegi lækjarins verið breytt  og vegna mannvirkja hefur vatnið ekki komist eðlilegar leiðir í gegnum svæðið og safnast því fyrir og veldur flóðum í Jarðhitagarði ON.

Þetta er í fyrsta sinn sem ráðist er í álíka verkefni hér á landi og voru því sérfræðingar í náttúrumiðuðum lausnum frá Skotlandi kallaðir til, til þess að sýna okkur bestu aðferðirnar og að hanna farveginn fyrir okkur.

Í meðfylgjandi myndbandi má heyra þau Magneu Magnúsdóttur, umhverfis- og landgræðslustjóra ON, og dr. Hamish Moir, sérfræðing í endurbótum á vatnsföllum, lýsa þessu áhugaverða nýsköpunarverkefni, meðal annars hvernig þau notuðu svokallaðar grjótpylsur.

Það er viðeigandi að þetta nýsköpunarverkefni sé í gangi í Jarðhitagarðinum þar sem fyrirhugað er að nýsköpunarmiðstöðin Glóð rísi.