Forstjóri Matvæla- og landbúnaðarstofnunar Sameinuðu þjóðanna (e. Food and Agriculture Organization, FAO), Dr. Qu Dongyu ásamt sendinefnd, heimsótti Hellisheiðarvirkjun í síðustu viku. Í heimsókn sinni til Íslands óskaði hann sérstaklega eftir að fá að kynnast orkuframleiðslu á Íslandi og heimsækja fyrirtæki sem nýta sjálfbæra orku.

Í Hellisheiðarvirkjun tóku Sævar Freyr Þráinsson, forstjóri Orkuveitu Reykjavíkur, Eiríkur Hjálmarsson, sjálfbærnistjóri Orkuveitunnar, Lilja Björk Hauksdóttir, samskiptastýra ON og Bergur Sigfússon, Chief System Development Officer hjá Carbfix, á móti gestunum. Þau leiddu hópinn í gegnum Jarðhitasýningu virkjunarinnar áður en kynningar fóru fram á starfsemi Orku náttúrunnar og VAXA. Þá fengu gestir einnig innsýn í starfsemi Carbfix þegar þeir fóru í heimsókn í holutopphús þar sem CO2 er dælt niður í berg til varanlegrar geymslu.

Á meðal þess sem Dr. Qu hefur lagt áherslu á störfum sínum er Grænuborgar-framtakið sem miðar að eflingu grænna hagkerfa borga og traustra tengsla þeirra við landsbyggð í fæðuöryggisskyni. FAO fæst sérstaklega við baráttu gegn hungri í heiminum með því að stuðla að þróun í landbúnaði, fiskveiðum og skógrækt til að auka næringarframleiðslu og matvælaöryggi. Það átti því vel við fyrir forstjórann að kynnast VAXA Technologies í Jarðhitagarðinum en fyrirtækið sérhæfir sig í ræktun smáþörunga til framleiðslu á matvælum.

Það var okkur heiður að taka á móti Dr. Qu Dongyu og kynna fyrir honum hvernig jarðhiti og nýsköpun í kringum hann stuðla að sjálfbærni, orkuöryggi og verðmætum fyrir samfélagið.

Heimsókn forstjóra FAO undirstrikar alþjóðlegt mikilvægi jarðhita og íslenskrar þekkingar á sviði sjálfbærrar orkuvinnslu, nýtingar og kolefnisbindingar.