Stjórn og framkvæmdastjórn Orku náttúrunnar fékk kynningu á dögunum á því hvernig framkvæmdir við hreinsistöðina Steingerði ganga en áætlað er að hún verði tekin í notkun í lok árs. Þegar Steingerður verður komin í rekstur markar það stórt skref í átt að því að gera Hellisheiðarvirkjun nær sporlausa.

Þýðingarmikið framlag til loftslagsmála
Steingerður er hluti af Silfurbergsverkefninu sem er samstarfsverkefni ON og Carbfix, og hefur það markmið, ásamt núverandi hreinsistöð, að fanga nær allt koldíoxíð og brennisteinsvetni úr útblæstri Hellisheiðarvirkjunar sem er síðan dælt niður í basaltberglög til varanlegrar steinrenningar með Carbfix tækninni.

Verkefnið, sem hlaut árið 2021 600 milljóna króna styrk úr Nýsköpunarsjóði Evrópusambandsins, gæti því orðið fyrirmynd að því hvernig jarðvarmavirkjanir um allan heim geta dregið úr kolefnislosun sinni.

Mikilvægt að vera hluti af lausninni

Árni Hrannar Haraldsson, framkvæmdastjóri Orku náttúrunnar, segir að verkefnið undirstriki markmið ON um ábyrga nýtingu auðlinda í sátt við umhverfið. „Það er ánægjulegt að sjá verkefnið þróast eins hratt og örugglega og raun ber vitni. Þetta er aðeins byrjunin á því hvernig við getum stuðlað að ábyrgari orkuvinnslu og lagt okkar af mörkum í baráttunni við loftslagsvandann en það er yfirlýst markmið ON að gera virkjunina kolefnishlutlausa,“ segir Árni Hrannar.