Orka náttúrunnar stendur frammi fyrir stórum og spennandi áskorunum, meðal annars þeirri að auka framleiðslu á rafmagni og heitu vatni til þess að svara aukinni eftirspurn og skapa meiri verðmæti fyrir samfélagið.

Hellisheiðarvirkjun, sem er önnur tveggja jarðvarmavirkjana sem ON rekur, er stærsta jarðvarmavirkjun í Evrópu. Þar er bæði rafmagn og heitt vatn framleitt og má í raun segja að jarðhitinn sé lykillinn að lífsgæðum íbúa höfuðborgarsvæðisins. Ísland er mjög ríkt af hreinni orku en orkan er ekki sjálfgefin. Orkuþörf fer vaxandi og vill Orka náttúrunnar tryggja afhendingaröryggi auk þess að vinna af ábyrgð með auðlindirnar.

Eitt stærsta verkefni ON á næstu árum verður að fara í töluvert mikla orkuöflun og nýta þá aðallega jarðhitann. Fyrirhugað er að bora að minnsta kosti 16 nýjar vinnsluholur á næstu tveimur árum og nú þegar hefur verið byrjað að bora fyrstu holuna.  

Í nýjasta hlaðvarpsþætti Orkunnar í náttúrunni ræða þau Árni Hrannar Haraldsson framkvæmdastjóri Orku náttúrunnar og Ásdís Benediktsdóttir, auðlindaleiðtogi ON hjá deild Rannsókna og nýsköpunar Orkuveitunnar um borholuprógrammið svokallaða, orkuöflun ON og auðlindanýtingu. Þau fara yfir vegferðina framundan, áskoranirnar, tækifærin og hvernig jarðhiti heldur áfram að tryggja orku og lífsgæði fyrir íslenskt samfélag, í dag og til komandi kynslóða.