Jarðvarmahlaup Orku náttúrunnar fór fram í gær við frábærar aðstæður í hjarta Hengilsins. Veðrið lék við þátttakendur sem nutu einstakrar náttúruupplifunar í þessu einstaka hlaupi sem sameinar útivist, jarðhitann og stórbrotið landslag svæðisins.

Ræst var við Hellisheiðarvirkjun og lá 13 km hlaupaleiðin inn í Sleggjubeinsdal, upp í Sleggjubeinsskarð og meðfram Skarðsmýrarfjalli. Hlauparar komu svo aftur niður að virkjuninni, þar sem gleði og mikilfenglegt útsýni tóku á móti þeim á leið í markið.

Hlaupið var öllum opið og þátttaka ókeypis, en takmörkuð við 500 manns. Fljótlega varð uppselt í hlaupið og stemningin var frábær, bæði á meðal hlaupara og áhorfenda.

Jarðvarmahlaup ON er nú komið á kortið hjá hlaupurum sem eitt eftirminnilegasta náttúruhlaup ársins en tilgangur hlaupsins var að vekja athygli fólks á þessu stórbrotna útivistarsvæði í bakgarði höfuðborgarinnar sem og að hvetja sem flest til að nýta svæðið til að hlaða orkuna í fallegri náttúrunni.

Þau sem vilja gera það geta kíkt á áhugaverðar gönguleiðir og kort hér.

Fyrstu keppendur í mark í hlaupinu voru:

Karlar:                                                          Tími:

1.      Ingvar Hjartarson                        00:56:06

2.      Benedikt Óli Sævarsson            00:58:03            

3.      Gunnar Birnir Ólafsson              00:58:31

Konur:                                                          Tími:

1.      Jóhanna Ólafs                             01:03:22

2.      Daría Jósefsdóttir                      01:12:39

3.      Elsa Hannesdóttir                       01:14:24