Framkvæmdir eru hafnar við stækkun varmastöðvar í Hellisheiðarvirkjun sem mun auka heitavatnsframleiðslu til höfuðborgarsvæðisins verulega. Með framkvæmdunum eykst framleiðslan um 600 sekúndulítra og er það um 60% aukning á framleiðslugetu virkjunarinnar.  

Aukningin mun nýtast heimilum og fyrirtækjum á höfuðborgarsvæðinu, þar sem heita vatnið mun flæða til um 20 þúsund heimila eða 70–80 þúsund íbúa sem munu njóta góðs af og geta farið í heita sturtu og hitað heimilin sín. Með þessu er stigið mikilvægt skref til að mæta vaxandi þörf fyrir heitt vatn samhliða stækkun borgarinnar og uppbyggingu nýrra hverfa.

„Þetta er ótrúlega skemmtilegt verkefni og skiptir miklu máli fyrir samfélagið,“ segir Rúnar Freyr Ágústsson, verkefnastjóri fjárfestingaverkefna hjá Orku náttúrunnar, sem stýrir verkefninu. „Við erum að auka framleiðslugetu Hellisheiðarvirkjunar þannig að hún geti áfram staðið undir þeim kröfum sem samfélagið gerir til öruggrar og sjálfbærrar hitaveitu.“

Gríðarlega umfangsmikið verkefni

Verkefnið, sem er unnið fyrir Veitur sem dreifa heita vatninu til heimila og fyrirtækja, er gríðarlega umfangsmikið og margir aðilar koma að því. Héðinn er aðalverktaki og vinnur í samstarfi við fjölda undirverktaka, bæði innlenda og erlenda. Hluti búnaðar og lausna er unninn erlendis, meðal annars í Póllandi og Rúmeníu, þar sem framleiddir eru þeir hlutar sem ekki er hægt að vinna hér á landi.

Undirbúningur og þróun verkefnisins hefur staðið yfir í um þrjú ár og er áætlað að framkvæmdir taki um eitt ár til viðbótar. Gert er ráð fyrir að verkefninu ljúki um árslok 2026, alls fjórum árum eftir að það hófst.

Styrkir mikilvæga innviði samfélagsins

Með stækkun varmastöðvarinnar í Hellisheiðarvirkjun er Orka náttúrunnar að leggja sitt af mörkum til að styrkja mikilvæga innviði samfélagsins og tryggja að íbúar höfuðborgarsvæðisins hafi áfram aðgang að heitu vatni til húshitunar og daglegra nota, nú og til framtíðar.

Sjá má viðtal við Rúnar Frey Ágústsson hér fyrir neðan þar sem hann fer yfir framkvæmdina og mikilvægi hennar.