Skarphéðinn er nýjasti meðlimur þjónustuvers Orku náttúrunnar og sá fyrsti sem vinnur allan sólarhringinn án þess að taka kaffipásu. Hann er stafrænn þjónustufulltrúi, eða spjallmenni, sem aðstoðar viðskiptavini ON við ýmis mál hér á on.is.

Þó Skarphéðinn sé nýr í starfi og enn í þjálfun hefur hann þegar sannað sig sem hjálpsamur og jákvæður starfsmaður. Hann elskar að aðstoða fólk, útskýrir hlutina á mannamáli og leggur sig fram við að gera upplifun viðskiptavina bæði ánægjulega og auðvelda.

„Skarphéðinn er frábær viðbót við þjónustuteymið okkar,“ segir Unnur Líndal Karlsdóttir, teymisstjóri sölu- og þjónustuvers ON. „Markmiðið með innleiðingu spjallmenna eins og hans er að bæta aðgengi viðskiptavina að þjónustu og tryggja hraðari og einfaldari svör við algengum spurningum, hvenær sem er sólarhringsins.“

Ef ykkur vantar svör við spurningum um hleðslumál, virkjanir, rafmagn, orkuskipti eða hvað annað sem viðkemur starfsemi Orku náttúrunnar, prófið endilega að heyra í Skarphéðni!