Orka náttúrunnar og svissneska orkufyrirtækið Swiss Green Gas International Ltd. (SGGI) hafa gert með sér skriflegt samkomulag um frumhönnun á mögulegri viðbót við lofthreinsistöðina Steingerði sem staðsett er við Hellisheiðarvirkjun.

Skrifað var undir samkomulagið fyrir skömmu en hönnunin mun breyta Steingerði úr því sem kallað er CCMS (aðferð Carbfix) og yfir í CCU (bein nýting CO2). Í raun er um nokkurskonar „hybrid“ lausn að ræða þar sem áfram verður hægt að framkvæma báða ferla.

SGGI horfir síðan til þess að framleiða svokallað grænt gas úr koltvísýringnum (CO2)  af Hellisheiði. Grænt gas er endurnýjanlegt eldsneyti þar sem koltvísýringurinn er nýttur sem vetnisberi. Græna gasið nýtist í stað hins hefðbundna jarðefnagass sem við þekkjum t.d við kyndingu húsa, til þungaflutninga og í ýmsum iðnaði.

„Þetta er afar spennandi verkefni og verður gaman að vinna þetta með þessu flotta fyrirtæki. Steingerður hefur hingað til nýtt Carbfix aðferðina og bundið koltvísýringin í berg en nú ætlum við að sjá hvort ekki sé hægt að nýta hann áfram sem orkugjafa. Samkomulagið snýr einungis að frumhönnunarfasa og þegar honum er lokið tökum við stöðuna með áframhaldandi samstarf,“ segir Hjálmar Helgi Rögnvaldsson stjórnandi viðskiptaþróunar og orkumiðlunar hjá ON.

Swiss Green Gas International Ltd. er í eigu nokkurra lykilaðila í svissneska orkubransanum. Megin markmið fyrirtækisins er að greiða fyrir orkuskiptum með sérstaka áherslu á þróun endurnýjanlegra orkugjafa. Þar er sérstaklega horft til Power to X tækninnar, Græns gass og vetnis sem er talið skipta sköpum fyrir Sviss til að uppfylla loftslagsmarkmið sín. SGGI leggur sérstaka áherslu á að vera leiðandi á þessu sviði og skapa og deila þekkingu til annarra.

Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.