Orka náttúrunnar í samstarfi við sveitarfélagið Dalvík brást við ákalli um fleiri hleðslustöðvar vegna Fiskidagsins mikla og sendi tvær hleðslustöðvar norður. Von er á þúsundum gesta í heimsókn um helgina í tilefni hátíðarinnar og því veitir ekki af.

Staðsetning stöðvanna er sjávarmegin við Hafnarbraut 15 og eru þær 40 kW hvor um sig og gera vonandi sitt til að koma öllum örugglega heim eftir helgina. Stöðvarnar eru til bráðabirgða og eru annars notaðar til vara ef eitthvað kemur upp í hleðsluneti ON. Vonandi næst varanleg lausn á uppbygginu hleðsluinnviða á svæðinu fljótlega.

„Við urðum vör við umræðu um skort á hleðsluinnviðum í tengslum við þessa frábæru hátíð og vildum því svara kallinu þegar haft var samband við okkur og hjálpa rafbílaeigendum að hlaða batteríin. Hleðslulausnir ON eru ört stækkandi hluti af okkar sölu á rafmagni og við vinnum stöðugt að því að byggja upp einfaldar lausnir til að styðja við orkuskipti í samgöngum,“ segir Jóhann Ingi Magnússon, sölustjóri fyrirtækja- og einstaklingsmarkaðar ON.

Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.