Í Víðigerði við þjóðveg 1 í Víðidal hefur um langan tíma verið rekin veitingasala og nú síðustu ár með sérlega góðu orðspori. Það var árið 2014 sem mæðginin Kristinn Bjarnason og Guðlaug Jónsdóttir tóku við staðnum og hafa þau breytt og bætt jafnt og þétt síðan, ekki síst í Covid þegar þau tóku allt í gegn innandyra.

„Við viljum fara skynsömu leiðina og gerum þetta smátt og smátt. Það tekur tíma að byggja upp svona stað en við merkjum gríðarlega aukningu gesta eftir að við tókum við. Við erum með nokkuð fjölbreyttan matseðil og gefum engan afslátt af hráefninu og notum aðeins það besta. Þannig trúum við að ferðalangar komi aftur og aftur og það er líka okkar reynsla“, segir Kristinn.

Kjörinn staður til að staldra við og hlaða

Orka náttúrunnur setti nýverið upp tvær 150kW hleðslustöðvar í Víðigerði, enda um sérlega góða staðsetningu að ræða fyrir rafbílafólk þar sem þetta er nánast nákvæmlega mitt á milli Reykjavíkur og Akureyrar eða um 200 km. sem passar vel fyrir flesta rafbíla. Þarna geta allt að fjórir bílar hlaðið í einu þá á 75kW. Þeir sem ekki eiga ON-lykla geta nálgast þá í Víðigerði.

„Það skiptir máli fyrir fólk að komast í öfluga hleðslu og í Víðigerði er nóg að hlaða í kannski 15-20 mínútur til að halda áfram. Svo skemmir nú umhverfið ekki fyrir eða veitingastaðurinn sem býður upp á bestu borgarana á þjóðveginum ætla ég að fullyrða“, segir Guðjón Hugberg Björnsson tæknistjóri hleðslunets ON.

Tilboð til ON-lyklahafa

Í sumar bjóðum við rafbílafólki sérstakt ON tilboð á klassíska hamborgaranum eða 1.590 kr. í stað 2.190 kr. og 1.790 kr. með gosi í stað 2.490 kr. Það er nóg að sýna ON-lykilinn til að njóta þessara kostakjara. Við mælum eindregið með að fólk skoði næst þegar það á leið um þessar slóðir – tilboðið gildir út ágúst 2021.

Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.