Atli Björn Levy verkefnastjóri okkar hjá Orku náttúrunnar var í viðtali við Skessuhorn um veigamiklar framkvæmdir sem framundan eru við Andakílsárvirkjun. Þar kom meðal annars fram að tilgangur framkvæmdanna sé fyrst og fremst að tryggja öryggi, bæði fólks og umhverfis, en framkvæmdin gengur út á það að hreinsa set úr lóninu. Til þess að geta gert það þarf að byggja varnarstíflu, tæma lónið af vatni og gera það eftir skipulögðu verklagi. Atli Björn segir að við ætlum að gera þetta bæði varlega og að vanda okkur við verkið.

Áætlaður framkvæmdatími verksins er frá miðjum júní á næsta ári og eitthvað fram á veturinn. Engar breytingar verða gerðar á starfsemi virkjunarinnar við framkvæmdina og engar rekstrarlegar breytingar verða á miðlun og vatnshæð í Skorradalsvatni, hvorki á meðan framkvæmdinni stendur né eftir hana. Framkvæmdin er ekki líkleg til að hafa umtalsverð umhverfisáhrif. Hvað varðar ána sjálfa þá hefur lífríkið þar smám saman verið að ná sér á síðustu árum eftir umhverfisslys sem varð árið 2017. Eftir það slys hefur ON unnið að ýmsum úrbótum í samstarfi við landeigendur á svæðinu. Þar má meðal annars nefna bakkavarnir sem settar voru upp og seiðauppeldi sem hefur verið unnið að með veiðifélaginu.

Greinina í Skessuhorni geta áskrifendur blaðsins lesið hér.

Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.