Fréttir
2. júlí 2020

Jarðhitasýningin opnar aftur eftir breytingar

Við erum gríðarlega stolt af jarðhitasýningunni okkar í Hellisheiðavirkjun þar sem hægt er að upplifa með eigin augum græna, sjálfbæra orkuframleiðslu í einni stærstu jarðhitavirkjun í heimi. Við nýttum lokunartímann vegna Covid vel, og uppfærðum og endurbættum ýmislegt á sýningunni og bjóðum nú gestum og gangandi í heimsókn, frítt til 15. júlí.

„Jarðhitasýningin veitir innsýn í nýtingu jarðhita á Íslandi þar sem jarðfræði, tækni og saga eru sett fram á aðgengilegan og skýran hátt með myndum og margmiðlunartækni. Starfsfólk okkar deilir fróðleik með gestum og er reiðubúið að fylgja gestum um sýninguna. Þetta er fróðleg sýning fyrir alla fjölskylduna“, segir Berglind Rán Ólafsdóttir, framkvæmdastýra ON.

Við tökum vel á móti grænum ferðalöngum

Fyrir framan sýninguna er hraðhleðslustöð ON og því er tilvalið að hlaða bílinn meðan sýningarinnar er notið. Þá er einnig tilvalið að skoða svæðið, en Hengilssvæðið er rómað fyrir náttúrufegurð og kjörið til útivistar. Hér má finna flottar gönguleiðir sem allar eru vel merktar og aðgengilegar. Hvort sem fólk er að hugsa um göngutúr um Hengissvæðið eða sýninguna þá er tilvalið að kíkja á kaffihúsið okkar þar sem við bjóðum upp á kaffi, te, kalda drykki eða veitingar frá nærumhverfinu m.a. Almari bakara í Hveragerði.

Sýningin er opin alla daga frá kl. 9-17.