Viðskiptavinir ON ánægðastir

 Orka náttúrunnar hlaut í dag viðurkenningu sem það raforkusölufyrirtæki í landinu sem býr við mesta ánægju viðskiptavina sinna. 

Orka náttúrunnar hlaut í dag viðurkenningu sem það raforkusölufyrirtæki í landinu sem býr við mesta ánægju viðskiptavina sinna. 

Bjarni Már Júlíusson framkvæmdastjóri ON tók við viðurkenningarskjali þessa efnis þegar niðurstaða Íslensku ánægjuvogarinnar 2016 voru kynntar. Bjarni Már sagði við það tækifæri að fyrirtækið legði sérstaka áherslu á gagnlega upplýsingagjöf í öllum samskiptum við viðskiptavini og tiltók þá nýjung að nú geta rafbílaeigendur sótt sér í gegnum smáforrit upplýsingar um stöðu hraðhleðslustöðva ON.

Markmið Íslensku ánægjuvogarinnar er að gera samræmdar og óháðar mælingar á ánægju viðskiptavina og gera niðurstöðurnar opinberar. Mælingar eru einnig gerðar á nokkrum öðrum þáttum sem hafa áhrif á ánægjuna, svo sem ímynd, mati viðskiptavina á gæðum og tryggð viðskiptavina við viðkomandi fyrirtæki.

Orka náttúrunnar er ungur sproti með djúpar rætur. Fyrirtækið, sem er eitt af þremur dótturfyrirtækjum Orkuveitu Reykjavíkur, selur rafmagn um allt land. Rafmagnið er framleitt, ásamt heitu vatni fyrir höfuðborgarsvæðið, í virkjunum ON á Nesjavöllum og Hellisheiði. ON tók til starfa 1. janúar 2014 og er því nýorðið 3ja ára gamalt.

Bjarni Már gerði einmitt auðlindanýtingu ON að umtalsefni við afhendinguna í morgun. Hann sagði ON leggja sig fram um að vinna orku úr auðlindum landsins á ábyrgan hátt. Með sama hætti sé lögð áhersla á að auðvelda viðskiptavinum að nýta orkuna með skynsamlegum hætti. Hér á vefnum er handhæg reiknivél sem auðveldar fólki orkusparnað og fyrirtækið er leiðandi í uppbyggingu innviða fyrir rafbíla. 

ON og áður Orkuveita Reykjavíkur hafa tekið þátt í Íslensku ánægjuvoginni um árabil. Þetta er í fyrsta sinn sem fyrirtækin lenda í fyrsta sæti í þessari keppni um ánægðustu viðskiptavinina.

Starfsfólk ON fagnar verðlaunun í Ánægjuvoginni 2017