Royale kynnir sér íslensku umskiptin

Nokkrum dögum eftir að hafa fengið nýja orkustefnu samþykkta í franska þinginu, kynnti Ségolène Royale, orku- og umhverfisráðherra Frakka, sér umskiptin sem orðið hafa í orkumálum hér á landi.

Páll Erland, framkvæmdastjóri Orku náttúrunnar, tók á móti henni í Hellisheiðarvirkjun í dag, en hún er hér á landi í boði utanríkisráðherra, Gunnars Braga Sveinssonar, og Ragnheiðar Elínar Árnadóttir, iðnaðarráðherra.

 

Stór hlutur jarðhitans

Páll flutti kynningu um rekstur Hellisheiðarvirkjunar og þátt jarðhitans í að Íslendingar framleiða nánast alla raforku með endurnýjanlegum orkugjöfum og níu af hverjum tíu húsum eru tengd hitaveitum. Á síðustu áratugum hefur hlutur jarðefnaeldsneytis í allri orkunotkun á Íslandi farið úr 85% í 15%. Jarðefnaeldsneyti er nú nánast eingöngu notað í samgöngum og hefur Orka náttúrunnar verið í fararbroddi við að hvetja til aukinnar notkunar rafmagns til að knýja bifreiðar landsmanna.

 

Metnaðarfull markmið Frakka

Þann 22. júlí síðastliðinn samþykkti franska þingið nýja orkustefnu. Í henni er lýst þeim markmiðum að draga úr orkunotkun, draga úr losun kotvísýrings og auka framleiðslu rafmagns með endurnýjanlegum orkugjöfum um leið og dregið er úr raforkuframleiðslu úr kjarnorku. Frakkar framleiða einna mest rafmagn allra Evrópuþjóða í kjarnorkuverum, eða 75% af allri raforku í landinu.

Þessi markmið, sem á að ná með 20 aðgerðum, sem tilteknar eru í stefnunni, eru tengd Parísarfundi Sameinuðu þjóðanna í haust. Þar munu fulltrúar fjölda ríkja leggja fram fyrirheit um samdrátt í losun gróðurhúsalofttegunda.

 

Leiðandi stjórnmálakona

Ségolène Royale stendur mjög framarlega í frönskum stjórnmálum. Hún sat lengi á þingi og var fyrsta konan til að hljóta tilnefningu flokks síns til forsetakjörs. Hún var frambjóðandi Sósíalistaflokksins árið 2007 en tapaði í kosningunum fyrir Nicolas Sarkozy. Núverandi Frakklandsforseti, Francois Hollande, er fyrrverandi sambýlismaður Royale og eiga þau fjögur börn.

 

Generic Image
Páll Erland framkvæmdastjóri ON og Ségolène Royale við Hellisheiðarvirkjun þann 28. júlí 2015 Mynd: Fréttastofa RÚV.