Hafa samband Netspjall

Hlöður teknar í notkun á Landakoti og Kleppi

Settar hafa verið upp ON hleðslur fyrir rafbíla á tveimur starfsstöðvum Landspítala; á Landakoti og Kleppi. Um er að ræða tilraunaverkefni með Landspítala og er það hluti af umhverfisstefnu og loftslagsmarkmiðum hans.

Landspítalinn leggur þannig sitt af mörkum við orkuskipti í samgöngum með því að auðvelda starfsfólki aðgang að hleðslum fyrir rafbíla á nokkrum starfsstöðvum sínum. Síðar í sumar verða ON hlöður settar upp við starfsstöðvar spítalans við Hringbraut og í Fossvogi.

ON sér um uppsetningu og rekstur stöðvanna sem allar gerðir rafbíla geta nýtt sér. Starfsfólk Landspítala og aðrir rafbílaeigendur þurfa að sækja um ON lykil á vefsíðu ON til þess að geta nýtt sér hleðslurnar. Þær verða gjaldfrjálsar fyrst um sinn, en í haust þegar allir staðir eru komnir upp greiða viðskiptavinir fyrir þjónustuna.

Hleðslurnar eru 22kW en sérhver rafbíll stýrir hraða hleðslunnar sjálfur. Flestar rafbílategundir taka inn á sig ca. 6-7kWh á klst. og eru því um 4-5 klst. að fullhlaða sig í þessum hleðslum.

Það er sameiginleg skoðun ON og Landspítala að mikilvægt er að hraða orkuskiptum í samgöngum með því að efla innviði með þéttu neti hleðslustöðva og þróunin hefur verið jákvæð síðustu misseri.

Generic Image
Hafrún Þorvaldsdóttir, sölustjóri ON og Ingólfur Þórisson, framkvæmdastjóri rekstrarsviðs Landspítala taka formlega í notkun hlöðuna við Landakot. Guðjón Kristjánsson, starfsmaður Landspítala hlóð fyrstu hleðsluna á rafbíl sinn.
Hraðhleðsla

Landakot

Hraðhleðsla

Kleppur

Orka náttúrunnar og Deilir semja um viðhald stórra vélarhluta

Aukin þekking og sparnaður með viðgerðum innanlands

Orka náttúrunnar hefur samið við Deili ehf. um viðhald á aflvélum jarðgufuvirkjana ON. Verkið var boðið út á Evrópska efnahagssvæðinu en útboðið var afrakstur þróunarverkefnis sem hefur í senn lækkað kostnað ON vegna viðhaldsins og dregið úr áhættu sem fylgdi því að senda stóra vélarhluti til útlanda til viðhalds.

Rammasamningur til fjögurra ára

Útboðið var í tvennu lagi; viðhald á hverfilhjólum og leiðiskóflum í gufuaflvélum og svo vinna vélvirkja og fleiri að viðhaldi aflvélanna. Deilir átti hagstæðustu tilboð í báða þætti. Þar voru þeir Bjarni Már Júlíusson framkvæmdastjóri ON og Jóhann Jónasson stjórnarformaður Deilis sem undirrituðu samninginn í Hellisheiðarvirkjun að viðstöddu starfsfólki fyrirtækjanna. Samningurinn er til fjögurra ára og hann má framlengja.

Þróunarverkefni eftir hrun

Þegar kreppti að í rekstri eftir hrun, ákvað Orka náttúrunnar að kanna möguleika þess að flytja viðhald stórra vélarhluta í aflvélum Hellisheiðarvirkjunar og Nesjavallavirkjunar inn í landið. Þá hafði tíðkast um áratugaskeið að hverfilshjólin voru send úr landi til hefðbundins viðhalds. Viðhaldið felst einkum í að laga slit í hverfilshjólum og öðrum aflvélaghlutum. Þetta var kostnaðarsamt auk þess sem flutningur vélarhlutananna um langa vegu skapaði áhættu á hnjaski eða töfum í flutningum.

Árið 2013 hófst í Hellisheiðarvirkjun þróunarverkefni að flytja þetta mikilvæga reglubundna viðhald til landsins. Keyptur var búnaður og byggð upp þekking. Tilraunin gaf góða raun. Kostnaður við viðhaldið dróst saman, ekki þurfti að greiða fyrir það með erlendum gjaldeyri og reynsla ON er sú að viðgerðir síðustu missera endast betur en þær fyrri. Ávinningurinn var því margþættur.

Árangurinn nýtist jarðvarmageiranum í heild

Þegar þessi góði árangur þróunarverkefnisins lá fyrir, var ákveðið að bjóða viðhaldsvinnuna út á nýjum forsendum. Samningur Deilis og ON er niðurstaða þess útboðs og ON gerir sér góðar vonir um að  með honum festist hagkvæmnin í sessi og þessi nýja þekking verði jarðvarmanýtingu hér á landi til framdráttar.

Orka náttúrunnar hefur samið við Deili ehf. um viðhald á aflvélum jarðgufuvirkjana ON. Verkið var boðið út á Evrópska efnahagssvæðinu en útboðið var afrakstur þróunarverkefnis sem hefur í senn lækkað kostnað ON vegna viðhaldsins og dregið úr áhættu sem fylgdi því að senda stóra vélarhluti til útlanda til viðhalds.

Undirritun - Sæmundur, Bjarni, Jóhann og Baldur
Við undirritun samningsins. Frá vinstri: Sæmundur Guðlaugsson viðhaldsstjóri ON, Bjarni Már Júlíusson framkvæmdastjóri ON, Jóhann Jónasson stjórnarformaður Deilis, Baldur Jónasson framkvæmdastjóri Deilis.

Fræðslu- og skemmtidagur sumarstarfsfólks

Hinn árlegi fræðslu- og skemmtidagur sumarstarfsfólks var haldinn í júní. Þar hittist sumarfólkið okkar og átti saman saman góða stund. Fyrir hádegi var dagskrá fræðsluerinda þar sem fólk fræddist um sögu Orkuveitusamstæðunnar, CarbFix verkefnið og bindingu koltvísýrings í jörðu, áherslur samstæðunnar til að fjölga iðn- og tæknimenntuðu fólki ásamt því að rætt var um þjónustustefnu samstæðunnar og hvaða leiðum er beitt við að ná til viðskiptavina okkar. Dagskránni lauk með áhugaverðu erindi um #metoo og aðgerðir OR samstæðunnar í kjölfar þess. Eftir hádegi lét sumarstarfsfólkið rigninguna ekki á sig fá heldur skundaði í Hljómskálagarðinn og lét reyna á samvinnuhæfni, lipurð og gleði undir styrkri stjórn skátanna.

Sumarstarfsfólk OR samstæðunnar starfar við ýmis verkefni, m.a. garðyrkju, landgræðslu og fjölbreytt verkefni háskólanema sem tengjast starfsemi OR og dótturfélaga.

Frá skemmtidegi sumarstarfsfólks
Frá skemmtidegi sumarstarfsfólks

Hugbúnaðaruppfærsla á hraðhleðslum ON - kostnaðarlaust að hlaða

Dagana 28. júní til og með 2. júlí 2018 erum við að uppfæra hugbúnað tengdan hraðhleðslum ON um allt land. Að því gefnu getur þú notað hraðhleðslurnar okkar þér að kostnaðarlausu. Engin þörf er að nota ON lykilinn. Í því tilfelli þar sem óskað er eftir PIN er það 1234.

Meðan á þessu stendur þá gætu verið truflanir á uppfærslu hlaða í appi og á heimasíðu t.d. blá hlaða (upptekin) gæti verið græn (laus).

Við minnum á þjónustusímann okkar 591 2700 sem er opinn allan sólarhringinn.

Með kveðju, starfsfólk ON

Hraðhleðsla

Pages