Hlaða komin í Hornafjörð

Í gær tók ON í notkun hlöðu með hraðhleðslu fyrir rafbíla í Nesjum við Hornafjörð. Með þessu er enn eitt skrefið stigið til að opna hringveginn rafbílaeigendum. Það markmið mun nást fyrir páska og er Reykjahlíð við Mývatn næst á dagskrá. Hlaðan í Hornafirði er við Hótel Jökul í þéttbýliskjarnanum í Nesjum, sem stendur við hringveginn.

Opnum hringinn fyrir páska

Við höfum einsett okkur að opna allan hringveginn fyrir rafbílaeigendum með því að varða hann hlöðum. Framkvæmdir við hlöðu með hraðhleðslu í Reykjahlíð við Mývatn eru langt komnar. Hún verður tekin í notkun fyrir páska og þar með brúast síðasta bilið við hringveginn. Á Skjöldólfsstöðum á Jökuldal er ON búin að setja upp hlöðu með hefðbundinni (AC) hleðslu. Þar verður sett upp hleðsla með hærri spennu í vor eða snemmsumars.

Ryðjum hindrunum úr vegi

Umfangsmikil könnun um rafbíla, sem gerð var meðal almennings á Norðurlöndum í upphafi þessa árs, leiddi í ljós að Íslendingar eru einna viljugastir til að skipta yfir í rafbíl. Helsta hindrunin sem fólk sér er drægni bílanna. Hlöður ON eru til þess fallnar að draga úr ótta við ónæga drægni og þá eru ýmsir bílaframleiðendur sem óðast að setja á markað sífellt langdrægari rafbíla. Niðurstöður í umhverfiskönnun Gallup, sem kynntar voru í janúar, leiða svo ótvírætt í ljós að Íslendingar vilja vera umhverfisvænni í samgöngum. Til marks um það eru svör við tveimur spurningum, sem lagðar voru fyrir í könnuninni.

Niðurstöður úr Gallup könnun - graf 1

Niðurstöður úr Gallup könnun - graf 2

ON hlaða í Nesjahverfi
Axel Rúnar Eyþórsson, sérfræðingur hjá ON, Friðrik Jónas Friðriksson, framkvæmdastjóri Rafhorns og Margrét Ingólfsdóttir, hótelstýra Hótel Jökuls