Hærra raforkuverð og dregið úr áhættu

Fulltrúar ON og Silicor Materials hafa skrifað undir samning um sölu á 40 megavatta raforku til fyrirhugaðrar verksmiðju bandaríska fyrirtækisins á Grundartanga þar sem framleiddur verður kísill til raforkuframleiðslu úr sólarorku. Með samningnum hækkar það verð sem ON fær fyrir orkuna verulega og það er ekki tengt verði á afurðum kaupandans.

Fyrsti samningur ON við stórnotanda

Það voru þau Páll Erland, framkvæmdastjóri ON, og Terry Jester, stjórnarformaður Silicor Materials, sem undirrituðu samninginn við athöfn í Elliðaárstöðinni í dag. Þar hófst einmitt raforkuframleiðsla Reykvíkinga, sem ON hefur með höndum í dag. Samningurinn er fyrsti stórnotendasamningur um raforkusölu sem ON gerir eftir að að fyrirtækið tók við virkjanarekstri og raforkusölu OR í ársbyrjun 2014. ON á og rekur jarðgufuvirkjanirnar á Nesjavöllum og Hellisheiði auk vatnsaflsvirkjunar í Andakílsá.

Hærra verð og minni áhætta

Á næstu misserum renna út samningar um orkusölu til Landsvirkjunar sem OR gerði á árunum 1997 og 2000. Með samningi ON við Silicor tryggir fyrirtækið sölu á raforkunni sem bundin var í þeim samningum. ON mun því ekki ráðast í nýja virkjun til að afla orkunnar.

Auk þess að tryggja sölu raforkunnar, hækkar verðið verulega sem ON fær með nýja samningnum. Það er í bandaríkjadölum og mismunandi eftir áföngum afhendingar. Að jafnaði er heildsöluverðið í samningum farið að nálgast það sem heimili greiða fyrir rafmagn í smásölu í dag. Samningurinn er til 15 ára með möguleika á framlengingu. Afhending orku hefst á árinu 2018.

Í samningunum sem eru að renna út er innifalinn í verðinu flutningur raforkunnar, sem er á hendi Landsnets. Í samningi ON og Silicor er flutningur ekki innifalinn og þar með dregur úr áhættu ON af því að þróun flutningskostnaðar verði fyrirtækinu óhagstæð.

Umhverfisvæn framleiðsla

Sólarkísilframleiðsla þarf mikið rafmagn og er umhverfisvæn. Þannig þurfti fyrirhuguð verksmiðja ekki að gangast undir mat á umhverfisáhrifum að mati Umhverfisstofnunar. Silicor Materials áformar að framleiða allt að 19 þúsund tonn af sólarkísil á ári til að byrja með. Afurðin er meðal annars notuð til að framleiða búnað til rafmagnsvinnslu úr sólarljósi. Fyrirhuguð fjárfesting fyrirtækisins nemur um 120 milljörðum króna og gert er ráð fyrir að um 450 manns vinni við verksmiðjuna. Silicor Materials er fyrirtæki stofnað árið 2006 með höfuðstöðvar í Kaliforníuríki í Bandaríkjunum. Forstjóri fyrirtækisins og stjórnarformaður er Theresa Jester verkfræðingur. Hún hefur nær fjögurra áratuga reynslu af þróun og nýtingu sólarorku.

Páll Erland, framkvæmdastjóri ON:

„Þetta er góður samningur fyrir Orku náttúrunnar. Í fyrsta lagi tryggjum við sölu á orku sem var óseld. Í öðru lagi fáum við verulega hærra verð hana. Í þriðja lagi drögum við úr áhættu fyrirtækisins, hvorttveggja með því að raforkuflutningurinn er ekki hluti samningsins og að verðið er ekki tengt afurðaverði. Það er ekki síður jákvætt að okkar græna orka fari nú í framleiðslu sem miðar að því að vinna græna orku úr sólarljósi.“

Terry Jester, forstjóri og stjórnarformaður Silicor Materials:

„Það skiptir máli fyrir Silicor Materials að framleiða sínar umhverfisvænu afurðir hér á Íslandi með umhverfisvænni og endurnýjanlegri orku. Við erum ánægð með að hafa náð raforkukaupasamningi sem er báðum aðilum hagkvæmur; okkur og ON, og hlakkar til samstarfs um langa framtíð.“

Undirskrift Silicor
Terry Jester og Páll Erland