Við fengum góða heimsókn í vikunni þegar Mariana Mazzucato, heimsótti Hellisheiðarvirkjun í vikunni ásamt Andra Snæ Magnússyni, rithöfundi. Mazzucato er prófessor í nýsköpunarhagfræði og opinberri verðmætasköpun við University College London þar sem hún er stofnandi og forstöðumaður UCL Institute for Innovation and Public Purpose.

Í heimsókninni hitti hún Sævar Frey Þráinsson, forstjóra Orkuveitunnar, Margréti Lilju Hrafnkelsdóttur, viðskiptaþróunarstjóra Orku náttúrunnar, Valgerði B. Eggertsdóttur, leiðtoga hagaðilatengsla og sjálfbærni hjá ON, og Eddu Sif Pind Aradóttur, framkvæmdastjóra Carbfix, og fékk hún kynningu á starfsemi Orkuveitunnar, ON og Carbfix og fór auk þess í vettvangsferð að niðurdælingarholu.

Mazzucato var hér á landi til að vera viðstödd fund forsætisráðuneytisins um atvinnustefnu ríkisstjórnarinnar sem er í smíðum. Orka náttúrunnar hefur tekið virkan þátt í vinnu við mótun fyrirhugaðrar atvinnustefnu og telur afar mikilvægt að fá að leggja sitt af mörkum í þeirri vinnu. Slík stefnumótun skiptir miklu máli þar sem hún getur verið öflugt tæki til að móta hagvöxt, styðja við nýsköpun og skapa skýrari framtíðarsýn fyrir atvinnulífið.

Þátttaka fyrirtækja á borð við ON í þessari vinnu er jafnframt mikilvæg með tilliti til langtíma verðmætasköpunar, bæði fyrir samfélagið og eigendur, og stuðlar að því að nýta styrkleika Íslands á sviði endurnýjanlegrar orku, tækni og sjálfbærni til framtíðar.

Margrét Lilja Hrafnkelsdóttir kynnti starfsemi ON fyrir Mazzucato.