Bjarni Már ráðinn framkvæmdastjóri ON

Stjórn Orku náttúrunnar hefur gengið frá ráðningu Bjarna Más Júlíussonar í starf framkvæmdastjóra.

Bjarni Már hefur verið forstöðumaður tækniþróunar ON frá því fyrirtækið tók til starfa í ársbyrjun 2014 en hafði verið ráðinn til Orkuveitu Reykjavíkur árið 2012. Hann lauk B.Sc. prófi í rafmagnstæknifræði frá Tækniháskólanum í Óðinsvéum 1990 og lauk meistaraprófi í verkefnastjórnun frá Verkfræðideild Háskóla Íslands (MPM) 2008. Hann er vélfræðingur og lauk prófi frá Vélskóla Íslands 1983. Áður en hann gekk til liðs við OR hafði Bjarni Már starfað hjá Landsvirkjun og Landsvirkjun Power í 22 ár. Hjá því síðarnefnda starfaði hann sem verkefnastjóri við erlend virkjanaverkefni, aðallega í Kanada og á Grænlandi.

Starfið var auglýst laust til umsóknar í byrjun október og sóttu 63 um.

Bjarni Már tekur við starfinu í dag, mánudaginn 14. nóvember.

Bjarni Már Júlíusson
Bjarni Már Júlíusson, nýr framkvæmdastjóri ON