Afköst við lofthreinsun Hellisheiðarvirkjunar tvöfölduð

Ákveðið hefur verið að tvöfalda afköst lofthreinsistöðvar Hellisheiðarvirkjunar þannig að hún hreinsi allt að 60% brennisteins í útblæstri virkjunarinnar á árinu 2016.

Bjarni Bjarnason, forstjóri Orkuveitu Reykjavíkur (OR), greindi frá þessu á ársfundi fyrirtækisins í dag. Orka náttúrunnar (ON) er dótturfélag OR. Bjarni lýsti því yfir á sínum tíma að útblástur brennisteinsvetnis frá Hellisheiðarvirkjun væri „stærsti umhverfisvandi sem Orkuveitan glímdi við.“

Vísindalegu vopnabúri að þakka

Hann sagði við gesti ársfundarins í Gamla bíói að fyrirtækið hefði nú náð tökum á viðfangsefninu og þakkaði það „vísindalegu vopnabúri Orkuveitunnar og framúrskarandi samstarfi fræðimanna og rekstrarmanna innan og utan fyrirtækisins.“

Lofthreinsistöð var tekin í gagnið við Hellisheiðarvirkjun í tilraunaskyni í júní 2014. Hún hreinsar 25-30% brennisteinsvetnis í útblæstrinum, blandar því í vinnslusvatn virkjunarinnar og dælir niður á um 800 metra dýpi.

Ákveðið er nú að stækka stöðina og tvöfalda afköst hreinsunar. Eftir það verður styrkur brennisteins í útblæstri kominn langt niður fyrir mörk í vinnsluleyfi virkjunarinnar.

Annað viðfangsefni snýr að koltvísýringi í útblæstrinum. Það er alþjóðlegt vísindaverkefni sem Orkuveitan er í forystu fyrir, styrkt af Evrópusambandinu. Koltvísýringur er hreinsaður úr útblæstrinum, honum blandað í vinnsluvatn og dælt niður á um 400 metra dýpi. Þar fellur kolefnið út og myndar silfurberg.

Koltvísýringur verður að steini innan árs

Hildigunnur H. Thorsteinsson, framkvæmdastjóri Þróunar OR og stjórnarmaður ON, sagði á ársfundinum að á árinu 2014 hefði verið dælt niður um 1.300 tonnum af brennisteinsvetni – H2S og 2.400 tonnum af koltvísýringi – CO2. Fyrstu niðurstöður væru jákvæðar og í samræmi við væntingar en sérstaka athygli vekti að 80-90% af koltvísýringnum væru steinrunnin innan eins árs! Verkefnið vekur mikla athygli víða og fjallað hefur verið um að í erlendum vísindaritum og öðrum fjölmiðlum, þar á meðal í Science og New York Times.

Generic Image
Lofthreinsistöð Hellisheiðarvirkjunar